2026 சட்டமன்றத் தேர்தல் நெருங்கும் வேளையில், பாமக நிறுவனர் ராமதாஸைத் தங்கள் பக்கம் இழுக்க திமுக தீவிர முயற்சி மேற்கொண்டு வருகிறது. கட்சியின் சின்னமும் அங்கீகாரமும் தற்போது பாமக தலைவர் அன்புமணி ராமதாஸிடம் இருப்பதால், அவர் ஏற்கனவே அதிமுக – பாஜக தலைமையிலான தேசிய ஜனநாயகக் கூட்டணியில் (NDA) இணைந்துவிட்டார். இருப்பினும், “கட்சியைத் தொடங்கியது நான் தான், கூட்டணியை நானே முடிவு செய்வேன்” எனக் கூறி வரும் ராமதாஸுடன் அமைச்சர்கள் மூலம் திமுக தலைமை ரகசியப் பேச்சுவார்த்தை நடத்தி வருகிறது.
திமுகவின் இந்த முயற்சிக்குத் திராவிட மாடல் கூட்டணியில் உள்ள விடுதலைச் சிறுத்தைகள் கட்சி (விசிக) கடும் முட்டுக்கட்டை போட்டு வருகிறது. ராமதாஸ் உள்ளே வந்தால் தாங்கள் வெளியேற நேரிடும் எனத் திருமாவளவன் தரப்பு எச்சரித்து வரும் நிலையில், இதற்குப் பின்னணியில் நடிகர் விஜய்யின் தமிழக வெற்றிக் கழகம் (தவெக) இருப்பதாகக் கூறப்படுகிறது. தவெக-விடம் விசிக ரகசியத் தொடர்பில் இருப்பதால், பாமகவைச் சாக்காக வைத்து திமுக கூட்டணியிலிருந்து வெளியேற விசிக திட்டமிடுவதாக அரசியல் நோக்கர்கள் கணிக்கின்றனர்.