திமுகவின் ‘ஆபரேஷன் ஈகிள்’.. சிக்கப்போகும் முக்கியப் புள்ளிகள்?…. தவெக ஆட்சியை வீழ்த்த மெகா பிளான்… ராஜ்பவன் அனுப்பிய அந்த ‘ரகசிய’ கடிதம்…!

தமிழக வெற்றிக் கழக அரசு சட்டசபையில் தனது பலத்தை நிரூபிப்பதற்காகவும், ஆட்சியைத் தக்கவைத்துக்கொள்வதற்காகவும் குதிரை பேரத்தில் ஈடுபடுவதாக எதிர்க்கட்சியான திமுக கடுமையான புகார்களை எழுப்பியுள்ளது. இந்த விவகாரம் குறித்து தமிழக ஆளுநர் ராஜேந்திர விஸ்வநாத் அர்லேக்கரை இரண்டாவது முறையாகச் சந்தித்த திமுக தூதுக்குழு, தவெக அரசு மீது கூடுதல் ஆதாரங்களுடன் புதிய புகார் மனுவை அளித்துள்ளது. முதல் முறை அளித்த புகாரின் மீது எடுக்கப்பட்ட நடவடிக்கைகள் குறித்து திமுகவினர் கேள்வி எழுப்பிய நிலையில், அரசியல் களத்தில் இந்தச் விவகாரம் பெரும் புயலைக் கிளப்பியுள்ளது.

திமுகவின் முதல் புகாரைத் தொடர்ந்து, இது குறித்து விளக்கம் அளிக்குமாறு தமிழக தலைமைச் செயலாளர் சாய்குமார் மற்றும் சபாநாயகர் ஜே.சி.டி. பிரபாகரன் ஆகியோருக்கு ஆளுநர் மாளிகையிலிருந்து கடிதங்கள் அனுப்பப்பட்டிருந்தன. இருப்பினும், அரசு தரப்பிலிருந்தோ அல்லது சபாநாயகர் அலுவலகத்திலிருந்தோ இதுவரை எந்தவித விளக்கமும் அளிக்கப்படவில்லை. திமுக பிரதிநிதிகளுடனான இரண்டாவது சந்திப்பில், அரசிடமிருந்து இன்னும் எந்தப் பதிலும் வரவில்லை என்ற தகவலை ஆளுநர் அர்லேக்கர் உறுதிப்படுத்தியுள்ளார்.

அரசு தரப்பின் இந்த மௌனம் அரசியல் வட்டாரத்தில் பல்வேறு சந்தேகங்களை உருவாக்கியுள்ளது. ஆளுநர் விளக்கம் கேட்டு அனுப்பிய கடிதத்திற்குப் பதில் தராமல் தவெக அரசு அமைதி காப்பது, அவர்கள் தவறு செய்ததை மறைமுகமாக ஒப்புக்கொள்வதற்குச் சமம் என்று திமுகவினர் ஆளுநரிடம் காட்டமாக வாதிட்டுள்ளனர். மேலும், இரண்டாவது முறை புகார் அளித்த பிறகும் உரிய நடவடிக்கை எடுக்கப்படாவிட்டால், இந்த விவகாரத்தை நீதிமன்றத்திற்குக் கொண்டு சென்று சட்டரீதியாக எதிர்கொள்வோம் என்றும் திமுக திட்டவட்டமாகத் தெரிவித்துள்ளது.

திமுகவின் இரண்டாவது புகாரைத் தொடர்ந்து, ஆளுநர் மாளிகை மீண்டும் ஒரு விளக்கக் கடிதத்தை அரசுக்கு அனுப்பியுள்ளது. அடுத்த ஒரு வாரத்திற்குள் தவெக அரசிடமிருந்து உரிய பதில் வரவில்லை என்றால், ஆளுநர் தனது அடுத்தகட்ட அதிரடி நடவடிக்கையில் இறங்குவார் என எதிர்பார்க்கப்படுகிறது. அரசு தரப்பின் முக்கியப் பொறுப்பாளர்களை நேரடியாக ஆளுநர் மாளிகைக்கு அழைத்துப் பேசவும் திட்டமிடப்பட்டுள்ளதால், வரவிருக்கும் நாட்கள் தமிழக அரசியலில் முக்கிய திருப்பமாக அமையும்.