தமிழ்நாடு காங்கிரஸ் கமிட்டி தலைவர் மாணிக்கம் தாகூர் சென்னை செய்தியாளர் சந்திப்பில் தெரிவித்த கருத்துகள் தமிழக அரசியலில் பெரும் விவாதத்தை ஏற்படுத்தியுள்ளன. தவெக தலைமையிலான தற்போதைய கூட்டணி அரசில் தங்களுக்கு உரிய மரியாதையும் அதிகாரமும் கிடைத்துள்ளதாக அவர் வெளிப்படையாகக் குறிப்பிட்டுள்ளார். கடந்த திமுக ஆட்சிக்காலத்தில் காங்கிரஸ் கட்சிக்கு உரிய மரியாதை வழங்கப்படவில்லை என்றும், பல்வேறு அவமானங்களைச் சந்தித்ததால்தான் தாங்கள் ஆட்சியில் பங்கு கேட்டதாகவும் அவர் பகிரங்கமாகக் குற்றம் சாட்டியுள்ளார்.
முந்தைய ஆட்சியில் “ஆட்சியில் பங்கு” என்ற கோரிக்கையைத் தமிழக மக்கள் ஏற்றுக்கொள்ள மாட்டார்கள் என்று விமர்சித்தவர்கள் தற்போது அதற்குரிய பதிலை உணர்ந்துள்ளதாக மாணிக்கம் தாகூர் தெரிவித்துள்ளார். தவெக ஆட்சியில் மக்களுக்குச் சிறந்த முறையில் நல்லது செய்ய முடிகிறது என்றும், கடந்த காலங்களில் எதிர்கொண்ட அவமானங்களைச் சுட்டிக்காட்டியே தாங்கள் இந்தக் நிலைப்பாட்டை எடுத்தோம் என்றும் அவர் விளக்கமளித்துள்ளார்.
இதற்கிடையே, வரவிருக்கும் பருவமழை மற்றும் புயல் தாக்கங்களை எதிர்கொள்ளும் வகையில் காங்கிரஸ் கட்சி சார்பில் நிவாரண மையங்கள் தொடங்கப்பட்டுள்ளதாக அவர் அறிவித்துள்ளார். சென்னை மட்டுமின்றி மதுரை மற்றும் திருநெல்வேலி மாவட்டங்களுக்கும் உதவி எண்கள் அறிவிக்கப்படவுள்ளதாகவும், மழைகாலம் முடியும் வரை இந்த முகாம்கள் முழுவீச்சில் இயங்கும் என்றும் அவர் உறுதிப்படுத்தியுள்ளார். அரசைப் போலக் காங்கிரஸ் தோழர்களும் களத்தில் நின்று உதவிகளைச் செய்வார்கள் எனவும், இது கட்சி மற்றும் நன்கொடையாளர்களின் சொந்த நிதியைக் கொண்டே செயல்படுத்தப்படும் எனவும் அவர் தெளிவுபடுத்தினார்.
மேலும், செய்தியாளர்களைச் சந்தித்தபோது அண்ணாமலை மீது மாணிக்கம் தாகூர் கடுமையான விமர்சனங்களை முன்வைத்தார். அண்ணாமலை ஆர்எஸ்எஸ் அமைப்பின் முகமூடியாகவே செயல்பட்டு வருவதாகவும், தமிழகத்தில் பாஜக அரசியல் எடுபடாததால் புதிய பேனர்களில் அவர்கள் வருவதாகவும் அவர் சாடினார். மேலும், எஸ்ஐஆர் விவகாரம் குறித்துப் பேசிய அவர், தவறு நடந்தபோது அண்ணாமலை எங்கே இருந்தார் என்று கேள்வி எழுப்பியதுடன், போலிகளைப் பார்த்து மக்கள் ஏமாற மாட்டார்கள் என்றும் கூறினார்.