தமிழகத்தில் தவெக ஆட்சியமைக்க காங்கிரஸ் ஆதரவு அளிக்க முன்வந்துள்ள நிலையில், திமுக செய்தித் தொடர்பாளர் சரவணன் தனது ‘எக்ஸ்’ (X) சமூக வலைதளப் பக்கத்தில் காங்கிரஸைக் கடுமையாக விமர்சித்துள்ளார். தவெக-வுக்கு ஆதரவு தருவது காங்கிரஸின் தனிப்பட்ட முடிவு என்றும், அதற்கு திமுகவின் அனுமதி தேவையில்லை என்றும் கூறியுள்ள அவர், “காங்கிரஸ் முதுகில் குத்திவிட்டது” எனத் தனது அதிருப்தியை வெளிப்படுத்தியுள்ளார்.
மேலும், இந்தத் தேர்தலில் காங்கிரஸ் வெற்றி பெற்ற 5 இடங்களுக்கும் திமுகவே முழுமையான காரணம் என்பதை அவர் சுட்டிக்காட்டியுள்ளார். திமுகவின் களப்பணி மற்றும் ஆதரவு இல்லாமல் காங்கிரஸால் இந்த வெற்றியைப் பெற்றிருக்க முடியாது என்ற தொனியில் அவர் தனது கருத்தைப் பதிவு செய்துள்ளார். ஒருமித்த கருத்துடன் பயணித்த கூட்டணியில், தேர்தல் முடிவுக்குப் பின் காங்கிரஸ் எடுத்துள்ள இந்த முடிவு திமுகவினரிடையே பெரும் கொந்தளிப்பை ஏற்படுத்தியுள்ளது.
ராகுல் காந்தியின் அரசியல் பிம்பத்தை நிலைநிறுத்துவதில் திமுகவின் பங்களிப்பை நினைவு கூர்ந்துள்ள சரவணன், “பாஜக மற்றும் ஆர்எஸ்எஸ் அமைப்பினர் ராகுல் காந்தியை ‘பப்பு’ என்று கிண்டல் செய்து கொண்டிருந்தபோது, நமது தலைவர் மு.க.ஸ்டாலின்தான் முதன்முதலில் அவரைப் பிரதமர் வேட்பாளராக முன்மொழிந்து அங்கீகாரம் தந்தார்” எனக் குறிப்பிட்டுள்ளார். இவ்வளவு நெருக்கமான நட்புறவில் இருந்தும், தற்போது காங்கிரஸ் எடுத்துள்ள நிலைப்பாடு அரசியல் துரோகம் என அவர் சாடியுள்ளார்.