தமிழகத்தில் சட்டமன்றத் தேர்தல் நெருங்கி வரும் சூழலில், ஆளுங்கட்சியான திமுகவிற்கும் அதன் முக்கிய கூட்டணிக் கட்சியான காங்கிரஸிற்கும் இடையே அதிகாரப் பகிர்வு தொடர்பாக கடும் கருத்து வேறுபாடுகள் எழுந்துள்ளன. கடந்த சில காலமாகவே தமிழக காங்கிரஸ் தலைவர்கள், வரும் தேர்தலில் வெற்றி பெற்றால் ஆட்சியில் பங்கு வேண்டும் என்றும், கூடுதல் தொகுதிகள் ஒதுக்கப்பட வேண்டும் என்றும் திமுக தலைமைக்கு அழுத்தம் கொடுத்து வந்தனர். இது தொடர்பான விவாதங்கள் சமூக வலைதளங்களில் இரு கட்சித் தொண்டர்களிடையே மோதலாக உருவெடுத்த நிலையில், தற்போது திமுக தலைவரும் முதல்வருமான மு.க. ஸ்டாலின் இதற்குத் திட்டவட்டமான பதிலை அளித்துள்ளார்.
தமிழகத்தின் அரசியல் சூழலைப் பொறுத்தவரை கூட்டணி ஆட்சி என்பது நடைமுறையில் இல்லை என்றும், அது சரியான முடிவாக இருக்காது என்றும் முதல்வர் ஸ்டாலின் அண்மையில் தெரிவித்துள்ளார். ஆட்சியில் பங்கு என்பது சாத்தியமில்லை என்பதை மறைமுகமாகவும் நேரடியாகவும் அவர் சுட்டிக்காட்டியுள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது. “இந்த யதார்த்தத்தை நாங்களும் புரிந்துள்ளோம், அவர்களும் (காங்கிரஸ்) புரிந்துள்ளார்கள், ஆனால் ஒரு சிலர் தேவையற்ற குழப்பத்தை உண்டாக்குகிறார்கள்” என்று ஸ்டாலின் கூறியது காங்கிரஸ் மேலிடத்திற்கு விடப்பட்ட நேரடி எச்சரிக்கையாகவே பார்க்கப்படுகிறது.
இந்த அறிவிப்பு காங்கிரஸ் தலைமைக்கும், குறிப்பாக ராகுல் காந்திக்கும் பெரும் அதிருப்தியை ஏற்படுத்தியுள்ளதாகத் தெரிகிறது. ஏற்கனவே தொகுதிப் பங்கீடு தொடர்பாக கனிமொழியிடம் ராகுல் காந்தி தனது கோரிக்கைகளை முன்வைத்திருந்த நிலையில், திமுக தரப்பிலிருந்து வந்த இந்த மறுப்பு அவரை அதிர்ச்சியில் ஆழ்த்தியுள்ளது. காங்கிரஸிற்கு கடந்த முறையை விட ஒரு சில தொகுதிகளைக் கூடுதலாகத் தர திமுக முன்வந்தாலும், அதிகாரத்தில் பங்கு என்ற பேச்சுக்கே இடமில்லை என்பதில் ஸ்டாலின் உறுதியாக உள்ளார்.
தமிழகத்தில் தற்போது நடிகர் விஜய்யின் தமிழக வெற்றிக் கழகம் ஒரு மாற்று சக்தியாக உருவெடுத்துள்ள நிலையில், காங்கிரஸின் இந்த அதிருப்தி கூட்டணியில் மாற்றத்தை ஏற்படுத்துமா என்ற கேள்வி எழுந்துள்ளது. ஒருபுறம் காங்கிரஸின் ஒரு பிரிவினர் திமுகவை விட்டு வெளியேறலாம் என்று கூறினாலும், மறுபுறம் திமுகவை விட்டுப் பிரிந்தால் தங்களுக்குப் பின்னடைவு ஏற்படும் என்ற அச்சமும் நிலவுகிறது. இந்தச் சிக்கலான சூழலில், பல ஆண்டுகாலமாகத் தொடர்ந்து வரும் திமுக-காங்கிரஸ் கூட்டணி வரும் தேர்தலில் நீடிக்குமா அல்லது உடையுமா என்பதைப் பொறுத்திருந்துதான் பார்க்க வேண்டும்.