சட்டப்பேரவையில் திமுக தனது வழக்கமான வியூகத்தை மாற்றி, அனுபவமிக்க மூத்த அமைச்சர்களுக்கு இணையாக அடுத்தகட்ட தலைவர்களுக்கும் களத்தில் உரிய வாய்ப்பளித்து வளர்ச்சிக்கான தளத்தை அமைத்து வருகிறது. சட்டமன்ற விவாதங்களில் கே.என்.நேரு, எ.வ.வேலு போன்ற மூத்த நிர்வாகிகளையே முழுமையாகச் சார்ந்திருக்காமல், மார்க்கண்டேயன், வசந்தம் கார்த்திகேயன் போன்ற அடுத்த தலைமுறைச் சட்டமன்ற உறுப்பினர்களை எதிர்க்கட்சிகளுக்கு எதிராகப் புள்ளிவிவரங்களுடன் களமிறக்குவது கட்சியின் திட்டமிட்ட நடவடிக்கையாகப் பார்க்கப்படுகிறது.
இளம் தலைமைகளை முன்னிலைப்படுத்துவதன் மூலம், குறிப்பிட்ட சில செல்வாக்குமிக்க மாவட்டப் பிரமுகர்களின் பிடியில் மட்டுமே கட்சி இருக்கிறது என்ற “குறுநில மன்னர்களின் கட்சி” என்ற விமர்சனத்திற்கு முற்றுப்புள்ளி வைப்பதோடு, எதிர்கால அரசியல் தேவைகளுக்கான புதிய தலைமுறை ஆளுமைகளையும் திமுக தலைமை திறம்படத் தயார்படுத்தி வருகிறது.