ஒரே கூட்டணியில் திமுக, தவெக.. புதிய பரபரப்பு… தமிழக அரசியலை உலுக்கும் ரகசிய டீலிங்….!

திமுக மற்றும் தமிழக வெற்றிக் கழகம் ஆகிய கட்சிகள் இடையே நிலவும் அரசியல் மோதல் குறித்து திமுக தலைவர்கள் தங்களது அதிரடியான கருத்துக்களைப் பகிர்ந்து வருகின்றனர். கேரளாவில் கம்யூனிஸ்ட் மற்றும் காங்கிரஸ் கட்சிகளும், மேற்கு வங்கத்தில் காங்கிரஸ் மற்றும் திரிணாமுல் காங்கிரஸும் இண்டியா கூட்டணிக்குள் இருந்து கொண்டே மாநில அளவில் எதிரெதிராக களம் காண்பது போல, தமிழகத்திலும் திமுகவும் தவெகவும் இணைந்து பாஜகவை எதிர்க்க வேண்டும் என்று விசிக தலைவர் திருமாவளவன் தெரிவித்திருந்தார்; இதனை காங்கிரஸும் வழிமொழிந்தது. ஆனால், இந்த யோசனையை திமுக திட்டவட்டமாக மறுத்துள்ளது. தங்களை முதன்மை அரசியல் எதிரி என்று பிரகடனப்படுத்தியுள்ள தவெகவுடன் எவ்வாறு இணைந்து செயல்பட முடியும் என்று கேள்வி எழுப்பியுள்ள திமுக எம்பி கணபதி ராஜ்குமார், கேரளா மற்றும் மேற்கு வங்க மாடல்கள் தமிழக அரசியலுக்கு எடுபடாது என்றும் தட்டையாகத் தெரிவித்துள்ளார்.

மேலும், தேசிய அளவிலான இண்டியா கூட்டணியின் நலனைக் கருதாமல், தேர்தலுக்குப் பிறகு அமைச்சரவையில் இடங்களைப் பெறுவதற்காக காங்கிரஸ் கட்சி திமுகவின் முதுகில் குத்திவிட்டு தவெகவுடன் கைகோர்க்க முயல்வதாகவும் அவர் கடுமையாக விமர்சித்துள்ளார். தவெகவை நோக்கித் தங்களை நகர்த்திக் கொள்ள தற்போதைய சூழலில் விசிக தலைவர் திருமாவளவனை ஒரு தூதுவராகப் பயன்படுத்த காங்கிரஸ் முயற்சிக்கிறது என்றும் குற்றம் சாட்டியுள்ளார். தமிழகத்தில் புதிய அரசியல் கணக்குகளைத் தொடங்க முயலும் தவெகவின் வியூகங்களுக்கு இடம் கொடுக்காத வகையிலும், தங்களின் கூட்டணிக்குள் எழும் மாற்று கருத்துக்களை முறியடிக்கும் வகையிலும் திமுகவின் இந்த எதிர்வினை தற்போதைய அரசியல் வட்டாரத்தில் பெரும் பரபரப்பை ஏற்படுத்தியுள்ளது.