சென்னையில் நடைபெற்ற தேமுதிக பூத் கமிட்டி ஆலோசனைக் கூட்டத்தில், பத்திரிகையாளர்களுக்கு எதிராக விடுக்கப்பட்ட பகிரங்க மிரட்டல் பெரும் பரபரப்பை ஏற்படுத்தியுள்ளது. தேமுதிக பொதுச்செயலாளர் பிரேமலதா விஜயகாந்த் தலைமையில் நடைபெற்ற இந்த நிகழ்வில், கட்சியின் நிர்வாகி ஒருவர் மேடையில் பேசுகையில், “பத்திரிகையாளர்களை வீடு புகுந்து அடிக்கும் சூழ்நிலை வந்துவிடும்” என்று எச்சரிக்கை விடுத்தது ஊடக வட்டாரங்கள் மற்றும் சமூக வலைதளங்களில் அதிர்ச்சியை ஏற்படுத்தியுள்ளது.
இந்தக் கூட்டத்தில் பேசிய அந்த நிர்வாகி, தான் ஏற்கனவே பத்திரிகையாளர்களைத் தாக்கியதற்காக மூன்று முறை சிறை சென்றிருப்பதாகவும், தற்போதைய சூழலில் தனக்கு அதிக கோபம் வருவதாகவும் ஆவேசமாகத் தெரிவித்தார். சமீபகாலமாக தேமுதிக அலுவலகத்தில் விருப்பமனு அளிக்க ஆள் இல்லாமல் வெறிச்சோடி இருப்பதை ஊடகங்கள் செய்தியாக்கியதால் அதிருப்தியில் இருந்த அவர், “சரியாக நடந்து கொள்ளுங்கள், இல்லையென்றால் விளைவுகள் கடுமையாக இருக்கும்” என்ற தொனியில் மிரட்டல் விடுத்தார்.
மிகவும் அதிர்ச்சிகரமான விஷயம் என்னவென்றால், ஒரு பொறுப்பான அரசியல் கட்சியின் பொதுச்செயலாளர் முன்னிலையிலேயே இத்தகைய வன்முறையைத் தூண்டும் பேச்சுக்கள் பேசப்பட்டும், பிரேமலதா விஜயகாந்த் அந்த நிர்வாகியைக் கண்டிக்காமல் மௌனம் காத்ததுதான். இது பத்திரிகையாளர்கள் மத்தியில் பலத்த அதிருப்தியை உருவாக்கியுள்ளது. விஜயகாந்த் இருந்த காலத்தில் ஊடகங்களுடன் ஒருவிதமான மோதல் போக்கு இருந்தபோதிலும், தற்போது பகிரங்கமாகத் தாக்குதல் நடத்துவோம் என்று மேடையில் பேசுவது ஆரோக்கியமான அரசியலுக்கு அழகல்ல என்று விமர்சகர்கள் கருத்து தெரிவிக்கின்றனர்.
சட்டமன்றத் தேர்தலுக்கான கூட்டணி மற்றும் தொகுதிகள் குறித்துப் பேச்சுவார்த்தைகள் நடந்து வரும் சூழலில், இத்தகைய சர்ச்சைகள் தேமுதிகவின் பிம்பத்தைப் பாதிக்கக்கூடும் எனத் தெரிகிறது. ஜனநாயகத்தின் நான்காவது தூணாகக் கருதப்படும் ஊடகவியலாளர்களுக்குப் பாதுகாப்பு உறுதி செய்யப்பட வேண்டிய நிலையில், ஒரு கட்சியின் முக்கியக் கூட்டத்திலேயே மிரட்டல் விடுக்கப்பட்டிருப்பது கண்டனத்திற்குரிய ஒன்றாக மாறியுள்ளது.