“வயிற்றில் நெருப்பை கட்டி கொண்டு நின்றேன்…” நந்தன் என் கதை இல்லை… படம் குறித்து இயக்குநர் இரா.சரவணன் உருக்கமான பதிவு…!!

‘கத்துக்குட்டி’ படத்தின் மூலம் இயக்குநராக அறிமுகமான இரா.சரவணன் இயக்கத்தில், நடிகர் சசிகுமார் கதாநாயகனாக நடித்த திரைப்படம் ‘நந்தன்’. திரையரங்குகளில் வெளியாகிச் சுமாரான வரவேற்பைப் பெற்ற போதிலும், அமேசான் பிரைம் ஓடிடி தளத்தில் வெளியான பிறகு மக்கள் மத்தியிலும் அரசியல் தலைவர்கள் மத்தியிலும் மிகப்பெரிய விவாதத்தையும் வரவேற்பையும் பெற்றது. இந்நிலையில், படம் வெளியாகி இரண்டு ஆண்டுகள் நிறைவடைந்ததை ஒட்டி இயக்குநர் இரா.சரவணன் தனது முகநூல் பக்கத்தில் உணர்ச்சிபூர்வமான பதிவொன்றைப் பகிர்ந்துள்ளார்.

அந்தப் பதிவில், “இரண்டு வருடங்களுக்கு முன் இதே நாளில் வயிற்றில் நெருப்பைக் கட்டிக்கொண்டு நின்றேன். நந்தன் என் கதையல்ல, பல நூறு தலித் பஞ்சாயத்து தலைவர்களின் துயர வாழ்வு. திரையரங்குகளில் படம் சரியாக ஓடாததால் அலுவலக அறையைச் பூட்டிக்கொண்டு அழுதேன். ஆனால் ஓடிடியில் வெளியான பிறகு சூப்பர் ஸ்டார் ரஜினிகாந்த் உட்படப் பல அரசியல் தலைவர்களும் பாராட்டி குரல் கொடுத்தனர்” எனக் குறிப்பிட்டுள்ளார்.

மேலும், “இந்தப் படத்தின் தாக்கத்தால் அரசுத் தரப்பு நடவடிக்கை எடுத்து, அடுத்த சுதந்திர தினத்தில் தலித் பஞ்சாயத்து தலைவர்கள் பலரும் முதன்முறையாகக் கொடியேற்றினார்கள். வட்டார வளர்ச்சி அலுவலர்களின் கறார் நடவடிக்கையால் அவர்களின் நெருக்கடிகள் குறைந்தன. இருப்பினும் இந்த மண்ணில் சாதியத் துயரங்கள் இன்னும் குறைந்தபாடில்லை. அநீதிகளைக் கண்டும் காணாமல் கடப்பவர்கள் மீது கோபம் வருகிறது, நந்தனின் பயணம் இன்னும் முடியவில்லை” என்று நெஞ்சை உருக்கும் வகையில் பதிவிட்டுள்ளார்.