சினிமாவை காப்பாற்ற எம்ஜிஆர் போட்ட உத்தரவு… சேரன் சொன்ன தகவல் – இப்போதும் அதை நடைமுறைப்படுத்த அரசுக்கு கோரிக்கை!

சமீபத்தில் நடிகர் ஆரி அர்ஜூனன் நடித்த போர்த் ஃப்ளோர் என்ற படத்தின் இசை வெளியீட்டு விழா நடந்தது. இந்த விழாவில் இயக்குனர் மற்றும் நடிகர் சேரன் பேசியதாவது, குடும்பத்திலிருந்து பணத்தை எடுத்து சினிமா தாகத்தில் இங்கு கொண்டு வந்து போடுகிற பணத்தை மீட்டு எடுப்பதற்கு தயாரிப்பாளர்களுக்கு வழி இருக்கிறதா என்றால் இல்லை. மனசாட்சியை அடகு வைத்துக்கொண்டு தயாரிப்பாளரை தெரிந்தே குழிக்குள் தள்ளுகிறோமா என்றால் ஆமாம். எம்ஜிஆர் முதலமைச்சராக இருந்தபோது நம்ம ஊரில் டப்பிங் படங்கள் நிறைய வந்து கொண்டிருந்தது. அப்போது தமிழ் படங்கள் காணாமல் போகிற சூழல் உருவானது. எல்லோரும் ஜாக்கி சான் தமிழ் பேசுவதை ரசித்துப் பார்க்க தொடங்கினோம். எம் ஜி ஆர் அப்போது என்ன பண்ணினார் என்றால் ஒரு ஆர்டர் போட்டார்.

அதில், எந்த திரையரங்கம் என்றாலும் கண்டிப்பாக 90 நாட்கள் தமிழ் படங்கள் போட வேண்டும். அப்படி போடவில்லை என்றால் லைசன்ஸ் ரத்து செய்யப்படும் என்றார். அதுபோல் இன்று சிறிய படங்களுக்கு 3 மாதங்கள் ஒதுக்கி கொடுங்கள். அது எந்த 3 மாதம் என்றாலும் பரவாயில்லை. 9 மாதங்கள் பெரிய படங்கள் போட்டுக் கொள்ளுங்கள். சிறிய படங்கள் வெளியான நேரத்தில் பெரிய படங்கள் வரக்கூடாது. 3 மாதத்தில் 72 சிறிய படங்கள் ரிலீஸ் ஆகும். தயாரிப்பாளர்கள் வாழ்வார்கள். இதை அனைவரும் சேர்ந்து அரசிடம் தயக்கமில்லாமல் முறையிட வேண்டும் என்று இயக்குனர் சேரன் அந்த விழாவில் பேசியிருக்கிறார்.