காதலியைக் கொன்று குப்பைக் குழிக்குள் புதைத்த கொடூரன்.. ஒரு அடி ஆழம் காட்டித்த தந்த உண்மை… தர்மபுரியை உலுக்கிய கொடூர கொலை…. வெளிவந்த திடுக்கிடும் உண்மை…!

தர்மபுரி மாவட்டம் கடத்தூர் 4-வது வார்டில் உள்ள காலி இடம் ஒன்றில் இருந்து வந்த துர்நாற்றம் அப்பகுதியில் பெரும் அதிர்ச்சியை ஏற்படுத்தியது. குப்பைகளுக்கு அடியில் ஒரு பெண்ணின் உடல் புதைக்கப்பட்டிருப்பதை அறிந்த மக்கள் போலீசுக்குத் தகவல் தெரிவித்தனர். தடய அறிவியல் துறையினர் உதவியுடன் ஒரு அடி ஆழத்திலேயே மீட்கப்பட்ட அந்த உடல், கள்ளக்குறிச்சியைச் சேர்ந்த 46 வயது பாப்பாத்தியினுடையது என அடையாளம் காணப்பட்டது. கடந்த ஆறு மாதங்களாக வெங்கடாசலம் என்பவருடன் அவர் அங்கு வாடகை வீட்டில் வசித்து வந்தது குறிப்பிடத்தக்கது.

உயிரிழந்த பாப்பாத்தியுடன் வசித்து வந்த வெங்கடாசலம் தலைமறைவான நிலையில், போலீசார் அவரைத் தீவிரமாகத் தேடிப் பிடித்தனர். அவரிடம் நடத்தப்பட்ட தீவிர விசாரணையில் பல திடுக்கிடும் உண்மைகள் வெளிவந்தன. பாப்பாத்தியின் நடத்தையின் மீது ஏற்பட்ட சந்தேகத்தால் கடந்த அக்டோபர் 2-ம் தேதி இருவருக்கும் இடையே கடும் தகராறு ஏற்பட்டுள்ளது. அப்போது ஆத்திரமடைந்த வெங்கடாசலம் பாப்பாத்தியைக் கட்டையால் தாக்கிவிட்டு அங்கிருந்து சென்றுவிட்டதாகக் கூறியுள்ளார்.

காயமடைந்து மயங்கிய பாப்பாத்தியை மருத்துவமனைக்கு அழைத்துச் செல்லாமல் விட்டுவிட்ட வெங்கடாசலம், அக்டோபர் 6-ம் தேதி வீடு திரும்பியபோது அவர் இறந்து கிடப்பதைக் கண்டுள்ளார். தன் மீது பழி வந்துவிடக் கூடாது என்பதற்காக, உடலைத் துணியால் மூட்டையாகக் கட்டி வீட்டின் அருகிலுள்ள காலி இடத்தில் குழிதோண்டிப் புதைத்துள்ளார். மேலும், பாப்பாத்தியைத் தேடி சொந்தக்காரர்கள் யாரும் வர மாட்டார்கள் என்ற கணக்கோடு, உடலை மறைக்க அதன் மேல் குப்பைகளையும் கொட்டிச் சென்றுள்ளார்.

தான் திட்டமிட்டுக் கொலை செய்யவில்லை என்று வெங்கடாசலம் வாதிட்டாலும், காயமடைந்தவரை மருத்துவமனைக்குச் சேர்க்காமல் விட்டதும், சடலத்தை ரகசியமாகப் புதைத்ததும் பல சந்தேகங்களை எழுப்பியுள்ளன. எனினும், அவசரத்தில் வெறும் ஒரு அடி ஆழத்திலேயே உடலைப் புதைத்ததால் வீசிய துர்நாற்றமே வெங்கடாசலத்தின் கொடூரச் செயலை வெளிச்சம் போட்டுக் காட்டியுள்ளது. இந்தச் சம்பவம் அப்பகுதி மக்களிடையே பெரும் சோகத்தையும் அதிர்ச்சியையும் ஏற்படுத்தியுள்ளது.