திருப்பூர் மாவட்டம் தாராபுரம் சட்டமன்றத் தொகுதியின் தேர்தல் களம் நாளுக்கு நாள் தீவிரமடைந்து வருகிறது. ஆனால், அரசியல் கட்சிகளின் வழக்கமான பலப்பரீட்சையைக் கடந்து, வாக்காளர்களின் வெளிப்படையான அதிருப்தியும் கோபமுமே தற்போதைய முதன்மை விவாதப் பொருளாக மாறியுள்ளது. சமூக வலைத்தளங்களில் கட்சி ஆதரவாளர்களால் கட்டமைக்கப்படும் விளம்பரப் பிம்பங்களுக்கும், தாராபுரத்தின் கிராமப்புறங்களில் நிலவும் அடிமட்ட எதார்த்தத்திற்கும் இடையே ஒரு பெரு இடைவெளி நிலவுகிறது. குறிப்பாக, தவெக வேட்பாளரின் தேர்தல் பிரச்சாரக் கள நிலவரத்தைப் பார்க்கும்போது, அக் கட்சி இத்தொகுதியில் தனது குறைந்தபட்ச வாக்கு சதவீதமான டெபாசிட் தொகையைக் காப்பாற்றுவதே கேள்விக்குறியாகியுள்ளது.
அதிமுக சார்பில் போட்டியிட்டு வெற்றிபெற்ற சத்யபாமா, குறுகிய காலத்திலேயே பதவியை ராஜினாமா செய்துவிட்டு தவெகவில் இணைந்த முடிவே அவருக்குப் பெருஞ்சுமையாக மாறியுள்ளது. “விரலில் வைக்கப்பட்ட மை அழியும் முன்பே, வாக்களித்த மக்களைக் கேட்காமல் ஏன் ராஜினாமா செய்தீர்கள்?” என்று கிராமப்புற வாக்காளர்கள் அவரைக் கடுமையாகக் கேள்வி எழுப்புகின்றனர். பஞ்சாயத்துகள் மற்றும் பேரூராட்சிகள் என அவர் செல்லும் இடங்களிலெல்லாம் “துரோகி” என்ற கோஷங்கள் பலமாக எதிரொலிக்கின்றன. இது வெறும் மாற்றுக் கட்சிகளின் எதிர்ப்பாக இல்லாமல், கட்சி சாராத நடுநிலை வாக்காளர்களின் நேரடி அதிருப்தியாக வெடித்து வருகிறது.
மக்களை நேரில் சந்திக்க முடியாமல் பலத்த போலீஸ் பாதுகாப்புடன் பிரச்சாரம் செய்ய வேண்டிய கட்டாயத்திற்கு வேட்பாளர் தள்ளப்பட்டுள்ளார். உப்பாறு அணை நீர் பங்கீடு மற்றும் அடிப்படைப் பிரச்சனைகளை முன்வைத்து உள்ளூர் விவசாயிகள் மற்றும் பொதுமக்கள் பிரச்சார வாகன முற்றுகைப் போராட்டங்களில் ஈடுபட்டு வருகின்றனர். மக்கள் தொடர் கேள்விகளைக் கேட்கத் தொடங்கும்போது, பிரச்சார உரையைப் பாதியிலேயே கைவிட்டுவிட்டு வேட்பாளர் புறப்பட்டுச் செல்லும் சம்பவங்கள் பல இடங்களில் தொடர்கதையாகி வருகின்றன.
பொதுமக்களின் இந்த அமைதியான எதிர்ப்பைக் கையாள்வதில் காவல்துறை கடுமையான முறைகளைப் பயன்படுத்துவதாகக் குற்றச்சாட்டுகள் எழுந்துள்ளன. எதிர்ப்பு நிகழ்வைச் செல்போனில் வீடியோ எடுத்த 15 வயது சிறுவன் உட்படப் பலரைக் காவல் நிலையம் அழைத்துச் சென்று வழக்கு பதிவு செய்த சம்பவம் மக்களிடையே கடும் கொந்தளிப்பை ஏற்படுத்தியுள்ளது. இணையத்தில் உருவாக்கப்படும் பிம்பங்கள் எதுவுமே களத்தில் மக்களின் கோபத்தைத் தணிக்க உதவாத நிலையில், இம்முறை சத்யபாமாவுக்கு டெபாசிட் இழப்பு என்பது தவிர்க்க முடியாத ஒன்றாக மாறியுள்ளதாகக் கள நிலவரங்கள் தெரிவிக்கின்றன.