எம்பி வீட்டிலேயே கைவரிசை…. பகல் பொழுதில் துணிச்சலாக சைக்கிளைத் தூக்கிய மர்ம நபர்…. கோவையில் அடுத்தடுத்து அரங்கேறும் திடுக்கிடும் திருட்டுச் சம்பவங்கள்….!

கோவையின் முக்கியப் பகுதியான திருச்சி ரோடு அருகே உள்ள வெங்கடலட்சுமி நகரில் குடும்பத்துடன் வசித்து வருபவர் தஞ்சாவூர் நாடாளுமன்ற உறுப்பினர் முரசொலி. கடந்த ஐந்து மாதங்களாக இப்பகுதியில் வசித்து வரும் இவரது வீட்டின் காம்பவுண்டுக்குள் நிறுத்தப்பட்டிருந்த விலை உயர்ந்த சைக்கிள் ஒன்றை மர்ம நபர் ஒருவர் சாதுரியமாகத் திருடிச் சென்றுள்ளார். கடந்த 1-ஆம் தேதி ஞாயிற்றுக்கிழமை காலை சுமார் 9:30 மணியளவில் நிகழ்ந்த இந்தத் துணிகரத் திருட்டுச் சம்பவம், அப்பகுதி மக்கள் மத்தியில் பெரும் அதிர்ச்சியையும் பரபரப்பையும் ஏற்படுத்தியுள்ளது.

மக்கள் பிரதிநிதியான நாடாளுமன்ற உறுப்பினரின் வீட்டிலேயே, அதுவும் பகல் நேரத்தில் புகுந்து மர்ம நபர் கைவரிசை காட்டியுள்ளது ஒட்டுமொத்தக் குடியிருப்புவாசிகளையும் உறைந்துபோகச் செய்துள்ளது. இந்தத் திருட்டுச் சம்பவம் தொடர்பான சிசிடிவி (கண்காணிப்பு கேமரா) காட்சிகள் தற்போது அப்பகுதிவாசிகளால் சமூக வலைதளங்களில் வெளியிடப்பட்டு வைரலாகி வருகிறது. பாதுகாப்புமிக்கதாகக் கருதப்படும் ஒரு விஐபி குடியிருப்புப் பகுதியில் இதுபோன்ற குற்றச் சம்பவங்கள் அரங்கேறுவது பொதுமக்களுக்குப் பாதுகாப்பற்ற உணர்வை ஏற்படுத்துகிறது.

இதனையடுத்து, இப்பகுதியில் குற்றச் சம்பவங்களைத் தடுத்து பொதுமக்களின் பாதுகாப்பை உறுதி செய்யக் காவல்துறையினர் ரோந்துப் பணியைத் தீவிரப்படுத்த வேண்டும் என்று அப்பகுதி மக்கள் தீவிரக் கோரிக்கை விடுத்துள்ளனர். எம்பி வீட்டிலேயே நடந்த இந்தத் திருட்டுச் சம்பவம் குறித்த சிசிடிவி ஆதாரங்களைக் கொண்டு, காவல்துறையினர் உடனடியாகத் விசாரணை நடத்தி மர்ம நபரை விரைவில் கைது செய்வார்கள் என்று எதிர்பார்க்கப்படுகிறது.