அட கடவுளே… ஆபத்தான ரயில்வே பாலத்தில்… வாலிபர்களின் பகீர் ஸ்டண்ட்… சோஷியல் மீடியாவில் தீயாய் பரவும் வீடியோ… மும்பையில் பரபரப்பு…!

மும்பையின் பயந்தர் கிரீக் ரயில் பாலத்தில் இளைஞர்கள் சிலர் ஆபத்தான முறையில் சாகசங்களில் ஈடுபடுவதும், பாலத்தின் மீது கிராஃபிட்டி ஓவியங்களை வரைவதும் போன்ற வீடியோ சமூக வலைதளங்களில் வெளியாகி வைரலாகியுள்ளது. உயிருக்கு ஆபத்தை விளைவிக்கும் வகையில் எடுக்கப்பட்ட இந்த வீடியோ, ரயில் பயணிகள் மற்றும் பொதுமக்களிடையே பெரும் அதிர்ச்சியையும் கவலையையும் ஏற்படுத்தியுள்ளது.

அந்த வீடியோவில், இளைஞர்கள் ரயில்வே பாலத்தின் ஆபத்தான பகுதிகளில் நின்றுகொண்டு, ஓடும் ரயில்களுக்கு அருகே சாகசங்களை மேற்கொள்வதோடு சுவர்களில் ஓவியங்களையும் வரைகின்றனர். இத்தகைய பொறுப்பற்ற செயல்கள் அவர்களின் சொந்த உயிருக்கு ஆபத்தை ஏற்படுத்துவதோடு மட்டுமல்லாமல், ரயில்வே சொத்துக்களுக்குச் சேதம் விளைவித்து, ரயில் போக்குவரத்தின் பாதுகாப்பிற்கும் பெரும் அச்சுறுத்தலாக அமைகின்றன.

இந்த வீடியோ இணையத்தில் வேகமாகப் பரவியதைத் தொடர்ந்து, ரயில்வே நிர்வாகம் மற்றும் ரயில்வே பாதுகாப்புப் படை உடனடியாகப் பதிலளித்து விசாரணையைத் தொடங்கியுள்ளன. இதில் சம்பந்தப்பட்ட இளைஞர்களை அடையாளம் கண்டு அவர்கள் மீது சட்டப்படி கடுமையான நடவடிக்கை எடுக்கப்படும் என அதிகாரிகள் தெரிவித்துள்ளனர். மேலும், ரயில்வே வளாகங்கள் மற்றும் பாலங்களில் இதுபோன்ற ஆபத்தான செயல்களில் ஈடுபட வேண்டாம் என்றும் மீறினால் கடும் தண்டனை விதிக்கப்படும் என்றும் எச்சரிக்கப்பட்டுள்ளது.