தமிழக சட்டமன்றத் தேர்தலில் அதிமுக மூன்றாவது இடத்திற்குத் தள்ளப்பட்டதைத் தொடர்ந்து, கட்சியில் உட்கட்சி மோதல் தீவிரமடைந்து தற்போது இரண்டாகப் பிளவுபட்டுள்ளது. தற்போதைய நிலவரப்படி, எடப்பாடி பழனிசாமி (இபிஎஸ்) தலைமைக்கு 22 எம்.எல்.ஏ-க்களும், எஸ்.பி.வேலுமணி மற்றும் சி.வி.சண்முகம் தலைமையிலான அதிருப்தி அணிக்கு 25 எம்.எல்.ஏ-க்களும் ஆதரவு தெரிவித்துள்ளனர். இந்த அரசியல் பரபரப்புக்கு மத்தியில், எடப்பாடி பழனிசாமி அதிரடியாக 28 மாவட்ட செயலாளர்களைப் பதவியிலிருந்து நீக்கி உத்தரவிட்டார். இதனால் அதிமுகவில் அடுத்த கட்ட நகர்வு என்னவாக இருக்கும் என்ற பெரும் எதிர்பார்ப்பு எழுந்துள்ளது.
இந்த இக்கட்டான சூழலில், எடப்பாடி பழனிசாமி தலைமையில் சென்னை தலைமை அலுவலகத்தில் அதிமுக மாவட்ட செயலாளர்கள் கூட்டம் நடைபெற்றது. இக்கூட்டத்தில் பேசிய இபிஎஸ், “பதவிக்காகச் சிலர் கட்சிக்குத் துரோகம் செய்துவிட்டுச் சென்றுள்ளார்கள்; இந்த இக்கட்டான சூழலில் நாம் அனைவரும் ஒன்றிணைந்து செயல்பட வேண்டும்” என்று நிர்வாகிகளுக்கு அழைப்பு விடுத்தார். மேலும், இக்கூட்டத்தில் பங்கேற்ற மாவட்ட செயலாளர்கள், தங்கள் மாவட்டங்களைச் சேர்ந்த பொதுக்குழு உறுப்பினர்கள் எடப்பாடி பழனிசாமிக்கு ஆதரவளித்து கையெழுத்திட்ட படிவங்களை அவரிடம் முறைப்படி சமர்ப்பித்து தங்களின் பலத்தை நிரூபித்தனர்.
இதற்குப் பதிலடி கொடுக்கும் வகையில் அதிருப்தி அணியின் முக்கிய முகமான சி.வி.சண்முகம் செய்தியாளர்களைச் சந்தித்து இபிஎஸ் மீது அடுக்கடுக்கான குற்றச்சாட்டுகளை முன்வைத்தார். அதிமுகவின் தொடர் தோல்விகள் மற்றும் வாக்கு வங்கிச் சரிவு குறித்து ஆராய இபிஎஸ் மறுத்துவிட்டார் என்று கூறிய அவர், “அதிமுகவிலிருந்து பிரிந்து சென்ற ஓபிஎஸ் உள்ளிட்டோரை ஒன்றிணைக்க மறுத்ததாலும், வலிமையான கூட்டணியை உருவாக்காததாலும் தான் இந்தத் தோல்வி ஏற்பட்டுள்ளது. தமிழக வெற்றிக் கழகம் (தவெக), தேமுதிக, புதிய தமிழகம் ஆகிய கட்சிகளை அரவணைத்துச் செல்லாமல், இபிஎஸ் விதித்த நிபந்தனைகளால் அவர்கள் கூட்டணியை விட்டு வெளியேறினர்; பிரிந்தவர்களைச் சேர்த்திருந்தால் இபிஎஸ் மீண்டும் முதலமைச்சராகியிருப்பார்” என்று சாடினார்.
மேலும், தற்போதைய இபிஎஸ்-இன் அதிரடி நீக்க உத்தரவுகள் செல்லாது என்று குறிப்பிட்ட சி.வி.சண்முகம், “பொதுக்குழுவைக் கூட்டி விவாதிக்கக் கோரியதற்குப் பயந்து, பொதுக்குழு உறுப்பினர்களை மிரட்டி இபிஎஸ் தரப்பு கையெழுத்து வாங்கியுள்ளது. முந்தைய நீதிமன்றத் தீர்ப்புகளின்படி, ஜெயலலிதா மறைவின் போது யார் பொறுப்பில் இருந்தார்களோ அவர்களின் கையெழுத்தே செல்லும் என்பதால், இபிஎஸ் அறிவித்துள்ள புதிய மாவட்ட செயலாளர்கள் செல்லாத ஓட்டு” என்று அதிரடியாகத் தெரிவித்தார். இதனால் அதிமுகவின் இரு அணிகளுக்கும் இடையேயான மோதல் தற்போது நீதிமன்ற படியேறும் நிலையை நோக்கி நகர்ந்து கொண்டிருக்கிறது.