“தினமும் பாலியல் கொடுமை… வேதனையா இருக்கு..!” – சேலம் விவகாரத்தில் தமிழக அரசை அதிரவைத்த CPI வீரபாண்டியின் அறிக்கை…!!

தமிழகத்தில் அதிகரித்து வரும் பாலியல் வன்கொடுமை குற்றச் செயல்கள் பெரும் வேதனையளிப்பதாக இந்திய கம்யூனிஸ்ட் கட்சி தெரிவித்துள்ளது. குறிப்பாக, சேலம் மாநகரின் கொண்டலாம்பட்டி பகுதியைச் சேர்ந்த மணிகண்டன் (40) என்பவர், வறுமையில் உள்ள பெண்களுக்கு கடன் தருவதாக ஏமாற்றி, பாலியல் வணிகத்தில் ஈடுபடுத்திய கொடூரச் சம்பவம் பெரும் அதிர்ச்சியை ஏற்படுத்தியுள்ளது. இந்த வழக்கில் இதுவரை 50-க்கும் மேற்பட்ட பெண்கள் ஏமாற்றப்பட்டிருப்பது தெரியவந்துள்ளது. குற்றவாளியான மணிகண்டன் கைது செய்யப்பட்டு நீதிமன்றக் காவலில் வைக்கப்பட்டுள்ளார்.

கைது செய்யப்பட்டுள்ள மணிகண்டனின் அரசியல் பின்னணி குறித்து காவல்துறை தீவிரமாக விசாரணை நடத்தி, அதன் விபரங்களை வெளிப்படையாக அறிவிக்க வேண்டும் என்று இந்திய கம்யூனிஸ்ட் கட்சி கோரியுள்ளது. மேலும், தமிழகத்தில் புதிய ஆட்சி பெண்களின் பாதுகாப்பை உறுதி செய்யும் நோக்கில் அமைத்துள்ள “சிங்கப்பெண் சிறப்புப் படை”யின் பணிகளை முழுவீச்சில் விரிவுபடுத்த வேண்டும் என்றும் அக்கட்சி வலியுறுத்தியுள்ளது.

இந்தக் கொடூரச் செயலில் மணிகண்டன் ஒருவரை மட்டுமே குற்றவாளி என்று கூறி விசாரணையின் எல்லையைச் சுருக்கிவிடக் கூடாது என அறிக்கை வாயிலாக வலியுறுத்தப்பட்டுள்ளது. நீண்டகாலமாக நடந்து வந்த இந்த குற்றச்செயல் காவல்துறையினருக்குத் தெரியாமல் இருந்திருக்க முடியாது என்ற ஆழ்ந்த சந்தேகம் எழுவதால், அவருக்குப் பின்பலமாக இருந்தவர்கள் குறித்து விரிவான விசாரணை நடத்தப்பட வேண்டும். எனவே, இந்த வழக்கில் நேர்மையான விசாரணை நடைபெற ஏதுவாக, இதனை உடனடியாக சிபிசிஐடி பிரிவுக்கு மாற்ற வேண்டும் என இந்திய கம்யூனிஸ்ட் கட்சியின் தமிழ்நாடு மாநில செயலாளர் வீரபாண்டி தமிழக அரசை வலியுறுத்தியுள்ளார்.