தமிழக வெற்றிக் கழகத்தின் தலைவர் விஜய் மேற்கொண்டு வரும் அரசியல் பயணங்கள் மற்றும் அவரது பிரச்சார வாகனத்தை விமர்சித்து, மார்க்சிஸ்ட் கம்யூனிஸ்ட் கட்சியின் மாநில செயற்குழு உறுப்பினர் மதுக்கூர் ராமலிங்கம் அண்மையில் கடுமையான கருத்துக்களை முன்வைத்துள்ளார். தூத்துக்குடி மாவட்டம் கோவில்பட்டியில் நடைபெற்ற அரசியல் விளக்க பொதுக்கூட்டத்தில் பேசிய அவர், விஜய்யின் பிரச்சார வாகனத்தை ‘எமன் ஏறும் எருமை மாடு’ என்று ஒப்பிட்டுப் பேசியது அரசியல் வட்டாரத்தில் பெரும் பரபரப்பை ஏற்படுத்தியுள்ளது.
விஜய்யின் பிரச்சார வாகனம் செல்லும் இடமெல்லாம் உயிரிழப்புகள் நிகழ்வதாகக் குற்றம் சாட்டிய மதுக்கூர் ராமலிங்கம், மதுரை, திண்டிவனம், கரூர் மற்றும் சேலம் ஆகிய இடங்களில் நடந்த விபத்துகளைச் சுட்டிக்காட்டினார். இந்த வாகனம் எங்கு சென்றாலும் ஒரு பலியை வாங்காமல் திரும்புவதில்லை என்று அவர் காட்டமாக விமர்சித்தார். மேலும், தவெக ஒரு அரசியல் கட்சி போலவே செயல்படவில்லை என்றும், அது ஒரு நாடகக் கம்பெனியைப் போல இருப்பதாகவும் அவர் சாடினார்.
பாஜக தலைவர் நயினார் நாகேந்திரன் விஜய்யின் தனிப்பட்ட வாழ்க்கை குறித்து விமர்சித்ததற்கு கண்டனம் தெரிவித்த மதுக்கூர் ராமலிங்கம், கொள்கை ரீதியாக மட்டுமே விமர்சனங்கள் இருக்க வேண்டும் என்றார். அதே சமயம், விஜய்யின் சமீபத்திய உரையை எள்ளி நகையாடிய அவர், விஜய் தனது கட்சி ஒரு சதவீத வாக்குகளைப் பெற்றாலே பெரிய விஷயம் என்ற ரீதியில் பேசுவதாகவும், சொந்தக் கட்சிக்கே ‘கால்ஷீட்’ கொடுக்கும் ஒரே தலைவர் விஜய் தான் என்றும் கிண்டல் செய்தார்.
தவெகவில் இணைந்துள்ள முன்னாள் அதிமுக பிரமுகர் செங்கோட்டையன் மற்றும் கட்சியின் பொதுச்செயலாளர் புஸ்ஸி ஆனந்த் ஆகியோரையும் அவர் விமர்சிக்கத் தவறவில்லை. கோட்டையைப் பிடிக்கப்போவதாகக் கூறிவிட்டு, இறுதியில் செங்கோட்டையனைப் பிடித்துள்ளதாக அவர் நகைச்சுவையாகக் குறிப்பிட்டார். விஜய்யின் அரசியல் நகர்வுகள் முதிர்ச்சியற்றதாக இருப்பதாகவும், இளைஞர்கள் இதில் ஏமாந்துவிடக் கூடாது என்றும் தனது உரையில் மதுக்கூர் ராமலிங்கம் வலியுறுத்தினார்.