வேலை இல்லைன்னு கவலையா?… மாடு மேய்த்தால் மாதம் ரூ.10,000 சம்பளம்… பாஜக அரசின் இந்தத் திட்டம் பற்றி உங்களுக்கு தெரியுமா…?

மறைந்து வரும் பாரம்பரிய மாடு மேய்க்கும் வழக்கத்தை மீட்டெடுக்கும் நோக்கில், ‘காவ்ன் குவாலா யோஜனா’ என்ற புதிய திட்டத்தை பாஜக அரசு அறிமுகப்படுத்தியுள்ளது. இத்திட்டத்தின் கீழ், கிராமங்களில் உள்ள பசுக்களைக் காலையில் மேய்ச்சலுக்கு அழைத்துச் சென்று, மாலையில் பத்திரமாகத் திரும்பக் கொண்டு வரும் பணிக்காக ஒருவருக்கு (குவாலா) மாதம் ரூ.10,000 வரை ஊதியம் வழங்கப்படும். சுமார் 70 பசுக்களுக்கு ஒரு இடையர் என்ற அடிப்படையில் இந்த நியமனம் நடைபெறும். முதற்கட்டமாக ராஜஸ்தான் மாநிலத்தின் கோட்டா மாவட்டத்தில் உள்ள 14 கிராமங்களில் இந்தத் திட்டம் தொடங்கப்பட்டு, பணியாளர்களுக்கு மாலை அணிவித்துக் கௌரவிக்கப்பட்டுள்ளது.

இத்திட்டத்தின் சிறப்பம்சமே இதன் நிதி மேலாண்மை ஆகும்; இதற்கான ஊதியம் நேரடியாக அரசு கஜானாவிலிருந்து வழங்கப்படாமல், கிராமத்தில் உள்ள தன்னார்வலர்கள், நன்கொடையாளர்கள் மற்றும் பொதுமக்களின் பங்களிப்பு மூலமே திரட்டப்படும். பசுவின் பால் குழந்தைகளின் மூளை வளர்ச்சிக்குச் சிறந்தது என்பதால், பசுக்களைப் பாதுகாப்பதை ஒரு சமூகக் கடமையாகக் கருதி இந்த முயற்சி எடுக்கப்பட்டுள்ளதாக அமைச்சர் மதன் திலாவர் தெரிவித்துள்ளார். இத்திட்டம் கிராமப்புறங்களில் வேலைவாய்ப்பை உருவாக்குவதுடன், கால்நடை வளர்ப்பை ஊக்குவித்து பாரம்பரியத்தைப் பாதுகாப்பதிலும் முக்கியப் பங்கு வகிக்கும் என்று எதிர்பார்க்கப்படுகிறது.