“சொந்த மகள்களே மனைவிகள்… பேத்திகளே பிள்ளைகள்”… எந்த தந்தையும் செய்யாத உச்சக்கட்ட கொடூரம்… வெளிச்சத்திற்கு வந்த 40 ஆண்டுகால இருண்ட வாழ்க்கை…!

ஆஸ்திரேலியாவின் நியூ சவுத் வேல்ஸ் பகுதியில் உள்ள பூரோவா (Boorowa) எனும் சிறிய நகருக்கு அருகே, காடுகளுக்குள் மறைந்திருந்த ஒரு குடும்பத்தின் கொடூரமான உண்மைகள் வெளிவந்து உலகையே அதிர்ச்சியில் ஆழ்த்தியுள்ளன. “கோல்ட்” (Colt) என்ற புனைப்பெயரால் அழைக்கப்படும் இக்குடும்பத்தின் தலைவர் டிம் கோல்ட், பல தலைமுறைகளாகத் தனது சொந்த மகள்கள் மற்றும் பேத்திகளையே பாலியல் வன்கொடுமை செய்து வந்ததாகக் குற்றம் சாட்டப்பட்டுள்ளார். 2012-ஆம் ஆண்டில் காவல்துறை நடத்திய சோதனையில், சுமார் 38 பேர் மின்சாரம், குடிநீர் போன்ற அடிப்படை வசதிகள் எதுவுமின்றி, மிகவும் சுகாதாரமற்ற நிலையில் ஒரு முகாமில் வசித்து வந்தது கண்டறியப்பட்டது.

இந்தக் குடும்பத்தின் பின்னணி 1966-ல் தொடங்குகிறது. நியூசிலாந்தைச் சேர்ந்த உடன்பிறந்த சகோதரர் மற்றும் சகோதரியின் வழித்தோன்றல்களான ஜூன் மற்றும் டிம் கோல்ட், ஆஸ்திரேலியாவிற்கு குடிபெயர்ந்து ஏழு குழந்தைகளைப் பெற்றனர். இவர்களின் பிள்ளைகளான பெட்டி, சார்லி, ரோண்டா உள்ளிட்ட ஐந்து பேர் பின்னாட்களில் பல்வேறு குற்றவியல் வழக்குகளை எதிர்கொண்டனர். மரபணுப் பரிசோதனைகள் மூலம் இக்குடும்பத்தில் பிறந்த பெரும்பாலான குழந்தைகள் ரத்த உறவுகளுக்குள் (Incest) ஏற்பட்ட முறையற்ற உடலுறவின் மூலம் பிறந்தவர்கள் என்பது உறுதி செய்யப்பட்டது. ஜூன் 2001-ல் காலமான நிலையில், குடும்பத் தலைவர் டிம் கோல்ட் தனது அதிகாரத்தைப் பயன்படுத்தி குடும்பப் பெண்களைத் தொடர்ந்து சித்திரவதை செய்துள்ளார்.

குடும்ப உறுப்பினரான மார்த்தா என்பவர், தனது ஐந்து பிள்ளைகளின் தந்தை யார் என்பது குறித்து தவறான தகவல்களை அளித்ததற்காக சிறைத்தண்டனை பெற்றார். விசாரணையில் மார்த்தாவின் பிள்ளைகளுக்கு அவரது தந்தை டிம், சகோதரர் சார்லி மற்றும் மற்றொரு சகோதரர் ஆகியோர் தந்தையாக இருக்கலாம் எனத் தெரியவந்தது. மேலும், டிம் கோல்ட் தனது மற்றொரு மகள் பெட்டியின் 13 குழந்தைகளுக்கும், ரோண்டாவின் நான்கு குழந்தைகளுக்கும், ஏன் தனது பேத்தி ரேலினுக்கும் தந்தையாக இருந்திருக்க வாய்ப்புள்ளதாக ஆதாரங்கள் கூறுகின்றன. இச்சம்பவம் ஆஸ்திரேலிய வரலாற்றிலேயே மிகவும் மோசமான மற்றும் சிக்கலான குடும்பக் குற்றவழக்காகப் பார்க்கப்படுகிறது.

பூரோவா பகுதியில் அசுத்தமான சூழலில் வாழ்ந்து வந்த இந்தக் குழந்தைகள், ஊட்டச்சத்துக் குறைபாடுடனும், பேசும் திறனற்ற நிலையிலும் கண்டெடுக்கப்பட்டனர். முறையான பள்ளி வருகை இல்லாததால் அதிகாரிகளுக்கு ஏற்பட்ட சந்தேகமே, பல ஆண்டுகளாக மறைத்து வைக்கப்பட்டிருந்த இந்த அவலத்தை வெளிச்சத்திற்குக் கொண்டு வந்தது. 2013-ல் நீதிமன்றம் வழங்கிய தீர்ப்பின் மூலம், நாகரிக உலகம் அறியாத ஒரு கொடூரமான வாழ்வியல் முறை முடிவுக்கு வந்தது. பாதிக்கப்பட்ட குழந்தைகள் மீட்கப்பட்டு தற்போது அரசின் பாதுகாப்பு மற்றும் பராமரிப்பில் உள்ளனர்.