“விஜய் அலையில் சிக்கிய அதிமுக…” 2026 தோல்விக்கு பின்னால் இருக்கும் ‘அந்த’ ரகசிய ஸ்கெட்ச்… சசிகலா போட்ட மாஸ்டர் பிளான்… அதிமுகவில் அடுத்த வெடி… இபிஎஸ்-க்கு எதிராக சொந்த நிர்வாகிகளே போர்க்கொடி…!

ஒரு காலத்தில் ராணுவக் கட்டுப்பாட்டுடன் எஃகு கோட்டையாக விளங்கிய அதிமுக, முன்னாள் முதலமைச்சர் ஜெயலலிதாவின் மறைவிற்குப் பிறகு தொடர் சரிவுகளைச் சந்தித்து வருகிறது. எடப்பாடி பழனிசாமி (இபிஎஸ்) பொதுச் செயலாளராகப் பொறுப்பேற்ற பின்னர் சந்தித்த தேர்தல் தோல்விகளும், தமிழக அரசியலில் ஏற்பட்டுள்ள புதிய மாற்றங்களும் கட்சியைப் பலவீனப்படுத்தியுள்ளன. குறிப்பாக, 2026 சட்டமன்றத் தேர்தலில் ஏற்பட்ட பின்னடைவு மற்றும் தமிழக வெற்றிக் கழகத்தின் (தவெக) எழுச்சி காரணமாக, அதிமுகவின் முக்கிய தலைவர்கள் பலர் அக்கட்சியில் இணைந்து வருவது எடப்பாடி பழனிசாமிக்கு பெரும் நெருக்கடியை ஏற்படுத்தியுள்ளது. கோட்டை என கருதப்பட்ட கொங்கு மற்றும் தென் மாவட்டங்களிலேயே கட்சியின் செல்வாக்கு சரிந்து வருவது தற்போதைய தலைமைக்கு பெரிய சவாலாக மாறியுள்ளது.

இந்த இக்கட்டான சூழ்நிலையில், கட்சியின் தோல்விகள் குறித்து எடப்பாடி பழனிசாமி மாவட்ட நிர்வாகிகளுடன் தீவிர ஆலோசனை நடத்தி வருகிறார். சமீபத்தில் கும்பகோணப் பகுதி நிர்வாகிகளுடன் நடைபெற்ற ஆலோசனைக் கூட்டத்தில், டிடிவி தினகரனை மீண்டும் கட்சிக்குள் கொண்டு வர வேண்டும் என்று நிர்வாகி ஒருவர் இபிஎஸ்-இன் முகத்திற்கு நேராகவே பேசியது அங்கிருந்தவர்களை அதிர்ச்சியில் ஆழ்த்தியுள்ளது. ஒற்றைத் தலைமை முழக்கத்தால் ஓபிஎஸ், சசிகலா, டிடிவி தினகரன் என முக்கியத் தலைவர்கள் வெளியேற்றப்பட்ட நிலையில், இப்போது கட்சி அலுவலகத்திலேயே தனக்கு எதிராக நிர்வாகிகள் குரல் எழுப்புவதை எடப்பாடி பழனிசாமியால் சகித்துக் கொள்ள முடியவில்லை என்று அரசியல் வட்டாரங்கள் தெரிவிக்கின்றன.

கட்சிக்குள் நுழைய சசிகலா போட்ட ‘ஸ்கெட்ச்’? 2026 தேர்தலில் எடப்பாடி பழனிசாமி வென்றுவிட்டால் அவர் சக்தி வாய்ந்த தலைவராக மாறிவிடுவார் என்பதால், அவரை வீழ்த்த சசிகலா தரப்பு மறைமுகமாகத் திட்டமிட்டதாக டெல்டா பகுதி அதிமுகவினர் முணுமுணுக்கின்றனர். பலவீனமான கூட்டணி, வேட்பாளர்களுக்கு எதிரான உள்ளடி வேலைகள் என அனைத்தும் இபிஎஸ்-ஐ வீழ்த்த சசிகலா வகுத்த வியூகம் என்றும், தற்போது தேர்தல் தோல்விக்குப் பிறகு “அதிமுக ஒன்றிணைய வேண்டும்” என்ற கோரிக்கையைத் தனது ஆதரவாளர்கள் மூலம் சசிகலா தீவிரப்படுத்தி வருவதாகவும் சொல்லப்படுகிறது.

மறுபுறம், சசிகலாவை மீண்டும் அதிமுகவிற்குள் கொண்டு வருவதற்கான ரகசிய வேலைகளும் சத்தமில்லாமல் நடந்து வருவதாகக் கூறப்படுகிறது. “அதிமுக ஒன்றிணையாவிட்டால் தோல்விதான் மிஞ்சும்” என சசிகலா ஏற்கனவே எச்சரித்திருந்த நிலையில், தற்போது ஏற்பட்டுள்ள தேர்தல் தோல்வி அவரது கை ஓங்குவதற்குக் காரணியாக அமைந்துள்ளது. சசிகலா மற்றும் டிடிவி தினகரனின் ஆதரவாளர்கள் கட்சிக்குள் மீண்டும் ஆதிக்கம் செலுத்தத் தொடங்கினால், எடப்பாடி பழனிசாமியின் பொதுச் செயலாளர் பதவிக்கு ஆபத்து ஏற்படலாம் என்பதால் அதிமுகவில் மீண்டும் பரபரப்பான அரசியல் சூழல் தொற்றிக் கொண்டுள்ளது.