மும்பை கார் விபத்து… தவறு செய்த ஓட்டுநரின் அந்த ஒரு செயல்… கேமரா முன்னாடியே இப்படி ஒரு அநாகரிகமா… பதறிப்போன பொதுமக்கள்…!

மும்பையில் சாலையின் தவறான பக்கத்தில் அதிவேகமாக கார் ஓட்டிச் சென்று, முதியவர் உட்பட இருவர் மீது மோதிய அதிர்ச்சியூட்டும் காணொளி இணையத்தில் வைரலாகி பரவலான சீற்றத்தைத் தூண்டியுள்ளது. ஞாயிற்றுக்கிழமை இரவு சுமார் 9.09 மணியளவில் நிகழ்ந்த இந்தச் சம்பவத்தின் போது, அங்கிருந்த வழிப்போக்கர் ஒருவர் தனது காரை நிறுத்த முயன்றதால் ஓட்டுநர் கடும் ஆத்திரமடைந்துள்ளார். விபத்தை ஏற்படுத்தியது மட்டுமின்றி, தன் தவறைத் தட்டிக்கேட்ட அந்த நபரையும், சம்பவத்தைப் பதிவு செய்து கொண்டிருந்த மற்றவரையும் தகாத வார்த்தைகளால் திட்டி, நடுவிரலைக் காட்டி அநாகரிகமாக நடந்துகொண்ட பின் ஓட்டுநர் காரை எடுத்துக்கொண்டு தப்பியோடியுள்ளார்.

இந்த விபத்து மற்றும் ஓட்டுநரின் பொறுப்பற்ற நடத்தை குறித்த காணொளி சமூக ஊடகங்களில் பரவியதை அடுத்து, மும்பை காவல்துறை உடனடியாக நடவடிக்கை மேற்கொண்டுள்ளது. MH02BJ9778 என்ற பதிவு எண் கொண்ட அந்த வாகனத்தின் ஓட்டுநருக்கு எதிராக பாரதிய நியாய சன்ஹிதா மற்றும் மோட்டார் வாகனச் சட்டத்தின் பல்வேறு கடுமையான பிரிவுகளின் கீழ் (பிரிவுகள் 281, 125, 184 உள்ளிட்டவை) வழக்குப் பதிவு செய்யப்பட்டுள்ளது. இணையத்தில் வந்த புகாரை ஏற்று, சம்பந்தப்பட்ட துறை மூலம் தீவிர விசாரணை நடத்தப்பட்டு வருவதாகக் காவல்துறை தரப்பில் உறுதிப்படுத்தப்பட்டுள்ளது.

https://twitter.com/bhavin_h/status/2074032904028750278/video/1

இதற்கிடையில், மும்பையின் ஜோகேஸ்வரி மேற்குப் பகுதியில் சனிக்கிழமை அதிகாலை 1.20 மணியளவில் மற்றொரு கொடூரமான விபத்து நிகழ்ந்துள்ளது. அம்ருத் நகர் அருகே அதிவேகமாக வந்த டேங்கர் லாரி ஒன்று, ஆன்லைன் உணவு விநியோக ஊழியரான ஹர்ஷ் என்ற இளைஞரின் மீது பலமாக மோதியுள்ளது. விபத்தின் பயங்கர தாக்கத்தால் அந்த இளைஞர் சம்பவ இடத்திலேயே பரிதாபமாக உயிரிழந்தார். விபத்தை ஏற்படுத்திய டேங்கர் ஓட்டுநர் அங்கிருந்து தப்பியோட முயன்றபோது, அங்கிருந்த பொதுமக்கள் சாமர்த்தியமாகச் செயல்பட்டு அவரைத் துரத்திப் பிடித்து ஓஷிவாரா காவல்துறையிடம் ஒப்படைத்தனர்.

தகவலறிந்து சம்பவ இடத்திற்கு விரைந்த காவல்துறையினர், உயிரிழந்த இளைஞரின் உடலைக் கைப்பற்றி பிரேதப் பரிசோதனைக்கு அனுப்பி வைத்ததோடு, அவரது குடும்பத்தினருக்கும் தகவல் தெரிவித்துள்ளனர். மேலும், விபத்திற்குக் காரணமான டேங்கர் லாரி பறிமுதல் செய்யப்பட்டு, அதன் ஓட்டுநர் மீது உரிய பிரிவுகளின் கீழ் வழக்குப் பதிவு செய்யப்பட்டுள்ளது. மும்பையில் அடுத்தடுத்து நிகழ்ந்துள்ள இந்த விபத்துகள், சாலைப் பாதுகாப்பு மற்றும் ஓட்டுநர்களின் அத்துமீறல்கள் குறித்த பெரும் கவலையை மக்கள் மத்தியில் ஏற்படுத்தியுள்ளன.