2026 தமிழக சட்டமன்றத் தேர்தல் நெருங்கி வரும் வேளையில், திமுக கூட்டணியில் தொகுதிப் பங்கீடு மற்றும் ஆட்சிப் பகிர்வு குறித்த விவாதங்கள் சூடுபிடிக்கத் தொடங்கியுள்ளன. கடந்த காலங்களைப் போல வெறும் சட்டமன்றத் தொகுதிகளை மட்டும் எதிர்பார்க்காமல், இந்த முறை தமிழக அமைச்சரவையில் தங்களுக்கு 6 அமைச்சர் பதவிகள் வேண்டும் என்பதில் காங்கிரஸ் கட்சி பிடிவாதமாக இருப்பதாகத் தெரிகிறது. டெல்லியில் நடைபெறவுள்ள தமிழக காங்கிரஸ் தலைவர்களின் ஆலோசனைக் கூட்டத்தில் இது குறித்து முக்கிய முடிவுகள் எடுக்கப்படலாம் என எதிர்பார்க்கப்படுகிறது.
திமுக கூட்டணியில் நீண்டகாலமாக நீடித்து வரும் காங்கிரஸ், தற்போது தங்களுக்கு உரிய அங்கீகாரம் கிடைக்கவில்லை என்ற அதிருப்தியில் இருப்பதாகக் கூறப்படுகிறது. குறிப்பாக, ஆந்திரப் பிரதேச மாதிரியைப் பின்பற்றி கூட்டணியில் உள்ளவர்களுக்கு ஆட்சி அதிகாரத்தில் பங்கு அளிக்க வேண்டும் அல்லது கூடுதல் இடங்களை ஒதுக்க வேண்டும் என்ற கோரிக்கையை காங்கிரஸ் முன்வைத்துள்ளது. ஒருவேளை திமுக இதற்குச் சம்மதிக்கவில்லை என்றால், நடிகர் விஜய்யின் தமிழக வெற்றிக் கழகத்துடன் (தவெக) கூட்டணி அமைப்பது குறித்தும் அக்கட்சி ஆலோசித்து வருவதாகத் தகவல்கள் தெரிவிக்கின்றன.
தமிழக வெற்றிக் கழகம் புதிய கட்சியாக இருந்தாலும், சுமார் 20 சதவீத வாக்கு வங்கியைப் பெறக்கூடும் என்றும், அங்கு சென்றால் தங்களுக்குத் துணை முதல்வர் பதவி மற்றும் அதிக அமைச்சரவைப் பதவிகள் கிடைக்க வாய்ப்புள்ளதாகவும் காங்கிரஸ் தரப்பில் ஒரு பிரிவினர் கருதுகின்றனர். காங்கிரஸ் தலைவர்களின் இந்த அதிரடித் திட்டம் திமுக தலைமைக்குக் கடும் அதிர்ச்சியை ஏற்படுத்தியுள்ளது. ராகுல் காந்தி மற்றும் மு.க.ஸ்டாலின் இடையே சுமுகமான உறவு நீடித்தாலும், தமிழக அளவில் நிலவும் இந்த அதிகாரப் போட்டி கூட்டணியின் எதிர்காலத்தைக் கேள்விக்குறியாக்கியுள்ளது.