வேலூர் மாவட்ட அதிமுகவின் முக்கியப் புள்ளியும், முன்னாள் மாவட்டச் செயலாளருமான எல்.கே.எம்.பி. வாசு, அதிமுகவிலிருந்து விலகி நடிகர் விஜய் தலைமையிலான தமிழக வெற்றிக் கழகத்தில் (தவெக) இணைந்துள்ளது அரசியல் வட்டாரத்தில் பெரும் பரபரப்பை ஏற்படுத்தியுள்ளது. 1991-ம் ஆண்டு முதல் அதிமுகவில் பல்வேறு பொறுப்புகளை வகித்த இவர், ஒருங்கிணைந்த வேலூர் மாவட்ட மாணவர் அணிச் செயலாளர், வேலூர் கிழக்கு மாவட்டச் செயலாளர் மற்றும் 2009 நாடாளுமன்றத் தேர்தல் வேட்பாளர் எனப் பல முக்கியப் பங்களிப்புகளை ஆற்றியுள்ளார். சென்னையில் தவெக தலைவர் விஜய்யை நேரில் சந்தித்த வாசு, அவருக்கு எம்.ஜி.ஆர் குறித்த புத்தகத்தைப் பரிசாக வழங்கி முறைப்படி கட்சியில் இணைந்தார்.
சட்டமன்றத் தேர்தல் நெருங்கி வரும் வேளையில், வேலூர் மாவட்டத்தில் செல்வாக்கு மிக்க ஒரு மூத்த நிர்வாகி தவெகவில் இணைந்திருப்பது அதிமுகவினரிடையே அதிர்ச்சியை ஏற்படுத்தியுள்ளது. முன்னாள் அமைச்சர் செங்கோட்டையன் மற்றும் ஜே.சி.டி. பிரபாகர் போன்ற முக்கியத் தலைவர்கள் ஏற்கனவே தவெகவில் இணைந்துள்ள நிலையில், பொங்கலுக்குப் பிறகு அதிமுகவின் மேலும் பல நிர்வாகிகள் விஜய்யின் கட்சியில் இணைவார்கள் என்று எதிர்பார்க்கப்படுகிறது. இந்த வரவு வேலூர், காட்பாடி உள்ளிட்ட 9 சட்டமன்றத் தொகுதிகளில் தவெகவின் பலத்தை கணிசமாக அதிகரிக்கும் என அரசியல் ஆய்வாளர்கள் கருதுகின்றனர்.