“காங்கிரஸ் தலைவர் கார்கே தங்கிய இடத்தை கங்கை நீரால் தூய்மைப்படுத்திய விவகாரம்…” பா.ஜ.க அலுவலகத்தை முற்றுகையிட முயன்ற காங்கிரஸ்… பரபரப்பு சம்பவம்…!!

உத்தராகண்ட் மாநிலம் ஹல்த்வானியில் காங்கிரஸ் அகில இந்தியத் தலைவர் மல்லிகார்ஜுன கார்கே பங்கேற்ற பொதுக்கூட்டம் முடிந்த பிறகு, அந்த இடம் கங்காஜலத்தால் கழுவி ‘தூய்மைப்படுத்தப்பட்டதாக’க் குற்றச்சாட்டு எழுந்தது. தலித் சமூகத்தைச் சேர்ந்த தலைவரை அவமதிக்கும் வகையில் அமைந்த இந்தச் செயலுக்குக் கண்டனம் தெரிவித்து, மகாராஷ்டிர மாநிலம் கல்யாண் பகுதியில் காங்கிரஸார் பா.ஜ.க அலுவலகத்தை முற்றுகையிடத் திட்டமிட்டனர்.

கல்யாண் மாவட்ட இளைஞர் காங்கிரஸ் தலைவர் ஜப்ஜித் சிங் மாதா மற்றும் மகளிர் காங்கிரஸ் மாவட்ட தலைவி காஞ்சன் குல்கர்னி தலைமையில், சிவாஜி சௌக் பகுதியில் இருந்து திலக் சௌக்கில் உள்ள பா.ஜ.க அலுவலகம் நோக்கிப் பேரணியாகப் புறப்படத் தயாராயினர். ஆனால், அங்கு விரைந்து வந்த கல்யாண் நகர்ப் போலீசார் தடுப்புகளை அமைத்து அவர்களை மேலே செல்ல விடாமல் தடுத்து நிறுத்தினர்.

போலீசாரின் இந்தத் தடையை மீறிச் செல்ல முயன்றதால் காங்கிரஸாருக்கும் போலீசாருக்கும் இடையே காரசாரமான வாக்குவாதமும் தள்ளுமுள்ளும் ஏற்பட்டது. இதையடுத்துப் போராட்டத்தை முன்னெடுத்த முக்கிய நிர்வாகிகளையும் தொண்டர்களையும் போலீசார் அதிரடியாகக் கைது செய்து வாகனங்களில் ஏற்றிச் சென்றனர். ஜனநாயக முறையில் போராட முயன்றவர்களைக் கைது செய்து ஒடுக்கப் பார்ப்பதாகக் காங்கிரஸ் தலைவர்கள் போலீசாரைக் கடுமையாகச் சாடியுள்ளனர். பின்னர் கைதான அனைவரும் விடுவிக்கப்பட்ட போதிலும் அப்பகுதியில் தொடர்ந்து பரபரப்பு நிலவுகிறது.