தமிழகத்தில் 2026 சட்டசபை தேர்தல் களம் இப்போதே சூடுபிடிக்கத் தொடங்கியுள்ள நிலையில், திமுக கூட்டணியில் தொகுதிப் பங்கீடு தொடர்பான பரபரப்பான தகவல்கள் வெளியாகியுள்ளன. குறிப்பாக, காங்கிரஸ் கட்சி இந்த முறை கூடுதல் தொகுதிகள் மற்றும் ஆட்சியில் பங்கு என்ற கோரிக்கையை முன்வைத்துள்ள நிலையில், திமுக தலைமை அதனைத் திட்டவட்டமாக மறுத்துள்ளதாகத் தெரிகிறது. கடந்த 2021 தேர்தலைப் போலவே காங்கிரஸ் கட்சிக்கு 25 இடங்கள் மட்டுமே ஒதுக்கப்படும் என்றும், ஒரு சீட் கூட கூடுதலாக வழங்கப்படாது என்றும் திமுக தரப்பு பிடிவாதமாக இருப்பதாகக் கூறப்படுகிறது.
காங்கிரஸ் மட்டுமின்றி, கூட்டணியில் உள்ள விடுதலைச் சிறுத்தைகள் கட்சி, இந்திய கம்யூனிஸ்ட், மார்க்சிஸ்ட் கம்யூனிஸ்ட் மற்றும் மதிமுக ஆகிய கட்சிகளுக்கும் கடந்த முறை ஒதுக்கப்பட்ட அதே 6 தொகுதிகளை மட்டுமே வழங்க திமுக திட்டமிட்டுள்ளது. இதற்குப் பின்னால் ஒரு முக்கிய அரசியல் கணக்கு உள்ளது. நடிகர் விஜய்யின் தமிழக வெற்றிக் கழகம் வரும் தேர்தலில் களம் காண்பதால், வாக்குகள் சிதறுவதைத் தடுக்கவும், ஆளுங்கட்சி மீதான இயல்பான அதிருப்தியைச் சமாளிக்கவும் திமுக தனது சொந்த பலத்தில் அதிக இடங்களில் போட்டியிட விரும்புகிறது.
கூட்டணியைப் பலப்படுத்தும் நோக்கில் கமல்ஹாசனின் மக்கள் நீதி மய்யம் ஏற்கனவே திமுகவுடன் இணைந்துள்ளது. அத்தோடு, தேமுதிகவை தங்கள் கூட்டணிக்குள் கொண்டு வர திமுக தீவிர முயற்சிகளை மேற்கொண்டு வருகிறது. தேமுதிக இரட்டை இலக்க தொகுதிகளைக் கோரினாலும், அவர்களை ஒற்றை இலக்க இடங்களுக்குச் சம்மதிக்க வைக்க பேச்சுவார்த்தைகள் நடந்து வருகின்றன. புதிய கூட்டணிக் கட்சிகளுக்கு இடங்களை ஒதுக்க வேண்டிய கட்டாயம் இருப்பதால், பழைய கூட்டணிக் கட்சிகளுக்குக் கூடுதல் தொகுதிகளைத் தர முடியாது என்பதில் முதல்வர் ஸ்டாலின் உறுதியாக இருப்பதாகத் தெரிகிறது.
திமுகவின் இந்த கறாரான அணுகுமுறை கூட்டணிக் கட்சிகளிடையே ஒருவித சலசலப்பை ஏற்படுத்தினாலும், தற்போதைய அரசியல் சூழலில் திமுகவை விட்டுப் பிரிந்து செல்வது தங்களுக்குப் பாதகமாக அமையும் என்பதை இதர கட்சிகள் உணர்ந்துள்ளன. உதயசூரியன் சின்னத்தில் போட்டியிடும் சிறிய கட்சிகளுக்கும் பழைய ஃபார்முலாவே தொடரும் என எதிர்பார்க்கப்படுகிறது. மொத்தத்தில், 2021 வெற்றிகரமான ஃபார்முலாவையே மீண்டும் செயல்படுத்தி, ஆட்சியைக் தக்கவைக்க திமுக காய்களை நகர்த்தி வருகிறது.