அரசியல் மூத்த தலைவர் பண்ருட்டி ராமச்சந்திரன், 2026 சட்டமன்றத் தேர்தலை முன்னிட்டு ‘எம்.ஜி.ஆர் அண்ணா திராவிட முன்னேற்றக் கழகம்’ (MGR ADMK) எனும் புதிய கட்சியைத் தொடங்கியுள்ளார். காஞ்சிபுரத்தில் நடைபெற்ற கட்சியின் தொடக்க விழாவில், வரும் தேர்தலில் நடிகர் விஜய்யின் தமிழக வெற்றிக் கழகத்திற்குத் (TVK) தனது கட்சி முழு ஆதரவு அளிக்கும் என்று அவர் அதிகாரப்பூர்வமாக அறிவித்தார்.
தமிழகத்தில் தற்போது திமுகவுக்கும் தவெகவுக்கும்தான் நேரடிப் போட்டி நிலவுவதாகக் குறிப்பிட்ட அவர், ஊழலற்ற ஆட்சியைத் தர விஜய் முன்வந்துள்ளதாகப் பாராட்டினார். மேலும், தேர்தல் ஆணையம் விஜய்யின் கட்சிக்கு ஒதுக்கியுள்ள ‘விசில்’ சின்னத்திலேயே தனது கட்சியினரும் போட்டியிடத் தயாராக இருப்பதாகவும், தவெகவுடன் இணைந்து செயல்படத் தனது கட்சித் தொண்டர்கள் ஆர்வமாக இருப்பதாகவும் அவர் அதிரடியாகத் தெரிவித்துள்ளார்.