கோவை சூலூர் பகுதியில் வீட்டின் அருகே விளையாடிக்கொண்டிருந்த 10 வயது சிறுமி, காமுகன் ஒருவனால் பாலியல் வன்கொடுமை செய்யப்பட்டு கொடூரமான முறையில் கொலை செய்யப்பட்ட சம்பவம் ஒட்டுமொத்த தமிழகத்தையே உலுக்கியுள்ளது. இந்த கொடூரக் கொலையைத் தொடர்ந்து, சிறுமியின் உடல் பிரேதப் பரிசோதனை செய்யப்பட்டு, அவரது சொந்த ஊரான சேலம் மாவட்டம் கொளத்தூர் கிராமத்தில் இறுதிச்சடங்குகள் செய்யப்பட்டன. ஆனால், இந்த துயரத்திற்கு மத்தியிலும், சிறுமியின் மரணத்தில் தற்போது ஒரு புதிய மற்றும் அதிர்ச்சியூட்டும் சர்ச்சை வெடித்துள்ளது.
இறந்துபோன தன் பிஞ்சு மகளின் உடலை, தனக்கே தெரியாமல் அவசர அவசரமாக கணவர் வீட்டாரும் உறவினர்களும் எரித்துவிட்டதாக சிறுமியின் தாய் கண்ணீருடன் பகீர் குற்றச்சாட்டை முன்வைத்துள்ளார். இந்தச் செயல் ஒட்டுமொத்த வழக்கிலும், சிறுமியின் மரணத்திலும் இருக்கும் மர்மங்களை மேலும் அதிகப்படுத்தியுள்ளது. மகளை இழந்து தவிக்கும் அந்தத் தாய், தனக்கு இழைக்கப்பட்ட அநீதி குறித்து செய்தியாளர்கள் சந்திப்பில் கதறி அழுது வாக்குமூலம் அளித்துள்ளார்.
செய்தியாளர்கள் சந்திப்பில் சிறுமியின் தாய் பேசியதாவது, “என் மகளின் உடல் பிரேதப் பரிசோதனை செய்யப்பட்ட பிறகு, அவளது முகத்தைக் கூட என் கண்ணில் காட்டவில்லை. எனக்குத் தெரியாமல் மருத்துவமனையின் பின்வாசல் வழியாக உடலை ஆம்புலன்ஸில் ஏற்றி அனுப்பிவிட்டார்கள். என்னிடம் எந்த ஒரு வார்த்தையும் சொல்லாமல் என் கணவர் குடும்பத்தினர் உடலை எரித்துவிட்டனர்” என்று குற்றம் சாட்டியுள்ளார்.
மேலும் அவர் கூறுகையில், “உடலை எரிக்காமல் புதைத்திருந்தால், எதிர்காலத்தில் என் மகளின் இறப்பில் ஏதேனும் சந்தேகம் எழுந்தால் கூட, உடலைத் தோண்டி எடுத்து மறுபிரேதப் பரிசோதனை செய்து பார்த்திருக்க முடியும். ஆனால், இப்போது எனக்குத் தெரியாமலேயே உடலை எரித்து ஆதாரங்களை அழிப்பது போல் செய்துவிட்டார்கள். எனவே, என் கணவர் மற்றும் அவருடன் இருந்தவர்கள் மீது எனக்கு பலத்த சந்தேகம் இருக்கிறது, அவர்கள் மீது நான் குற்றம் சாட்டுகிறேன்” என்று கண்ணீர் மல்கக் கூறியுள்ளார். இச்சம்பவம் இந்த வழக்கில் புதிய திருப்பத்தையும், பெரும் பரபரப்பையும் ஏற்படுத்தியுள்ளது.