இணையத்தில் தற்போது பாம்புகள் தொடர்பான மீட்பு வீடியோக்கள் பெருமளவில் வைரலாகி வருகின்றன. குறிப்பாக, உத்தரப் பிரதேச மாநிலம் பிஜ்னோர் மாவட்டம் நஹ்தௌரில் உள்ள பைக் பழுதுபார்க்கும் கடைக்குள் புகுந்த நாகப்பாம்பு அனைவரையும் அதிர்ச்சிக்குள்ளாக்கியது. கடையைத் திறக்க வந்த மெக்கானிக் ஷாநாஸ், அங்கே நாகப்பாம்பு ஒன்று பதுங்கியிருப்பதைக் கண்டு பீதியடைந்தார். மேலும், அந்தப் பாம்பின் கழுத்தில் இரும்பு வளையம் ஒன்று சிக்கியிருந்தது கூடுதல் பதற்றத்தை ஏற்படுத்தியது.
உடனடியாக பாம்பு பிடிவீரர் பரத் பாஸ்கருக்கு தகவல் தெரிவிக்கப்பட்டு அவர் வரவழைக்கப்பட்டார். மெக்கானிக் ஷாநாஸின் உதவியுடன் நாகப்பாம்பைப் பிடித்த பாஸ்கர், அதன் கழுத்தில் சிக்கியிருந்த வளையத்தை அகற்றும் முயற்சியில் இறங்கினார். ஆரம்பத்தில் கடுகு எண்ணெயைத் தடவி மெதுவாக எடுக்க முயன்றபோது, பாம்பு தப்பிக்க முயன்று துடித்தது பெரும் சவாலாக அமைந்தது. இருப்பினும், மிகுந்த எச்சரிக்கையுடன் அந்த இரும்பு வளையம் வெற்றிகரமாக அகற்றப்பட்டு, நாகப்பாம்பு பாதுகாப்பாக வனப்பகுதியில் விடப்பட்டது.
இதேபோன்று, தமிழகத்தின் தேனி மாவட்டம் ஆண்டிப்பட்டி மலையடிவாரப் பகுதியில் அமைந்துள்ள முருங்கை தோட்டத்திற்குள் சுமார் 12 அடி நீளம் மற்றும் 25 கிலோ எடை கொண்ட ராட்சத மலைப்பாம்பு புகுந்த சம்பவம் பெரும் பரபரப்பை ஏற்படுத்தியது. தோட்டத்தில் இவ்வளவு பெரிய பாம்பைக் கண்டு விவசாயிகள் அதிர்ச்சியடைந்தனர். உடனே கண்டமனூர் வனத்துறையினருக்குத் தகவல் கொடுக்கப்பட்டு, அவர்கள் நவீன உபகரணங்களின் உதவியுடன் விரைந்து வந்து மலைப்பாம்பைப் பாதுகாப்பாகப் பிடித்தனர்.
தேனி மாவட்டத்தில் பெய்துவரும் தொடர் மழையால் வெள்ளநீரில் அடித்துவரப்பட்டு இந்த மலைப்பாம்பு தோட்டத்திற்குள் புகுந்திருக்கலாம் என வனத்துறையினர் கருதுகின்றனர். இறுதியில், பிடிபட்ட அந்த மலைப்பாம்பு அடர்ந்த வனப்பகுதியில் பத்திரமாக விடுவிக்கப்பட்டது. கழுத்தில் இரும்பு வளையத்துடன் சிக்கிய நாகப்பாம்பும், முருங்கை தோட்டத்திற்குள் புகுந்த ராட்சத மலைப்பாம்பும் அடுத்தடுத்து மீட்கப்பட்ட இந்தச் சம்பவங்கள், இணையத்தில் மக்களிடையே பெரும் கவனத்தையும் விழிப்புணர்வையும் ஏற்படுத்தியுள்ளன.