சென்னை கொளத்தூர் சட்டமன்றத் தொகுதி தவெக எம்.எல்.ஏ வி.எஸ்.பாபு, கடுமையான மூச்சுத்திணறல் காரணமாக சென்னை அமைந்தகரையில் அமைந்துள்ள எம்ஜிஎம் (MGM) மருத்துவமனையில் கடந்த 9-ஆம் தேதி சிகிச்சைக்காக அனுமதிக்கப்பட்டார். தீவிர சுவாசப் பிரச்சனை காரணமாக அவசர சிகிச்சைப் பிரிவில் அனுமதிக்கப்பட்டுள்ள அவருக்கு, செயற்கை சுவாசக் கருவி மூலம் தொடர்ந்து சிகிச்சை அளிக்கப்பட்டு வருகிறது. கடந்த 14 நாட்களாக மருத்துவ வல்லுநர்கள் குழுவினர் அவருக்குத் தீவிர சிகிச்சை அளித்து வரும் நிலையில், அவரது உடல்நிலை குறித்த விவரங்களை மருத்துவமனை நிர்வாகம் அவ்வப்போது அதிகாரப்பூர்வ அறிக்கைகளாக வெளியிட்டு வருகிறது.
அந்த வகையில், நேற்றைய தினம் எம்ஜிஎம் மருத்துவமனை நிர்வாகம் வெளியிட்ட அறிக்கையில், வி.எஸ்.பாபுவின் உடல்நிலை தற்போது சீராக உள்ளதாகவும், இருப்பினும் மருத்துவக் குழுவினரால் தொடர்ந்து கண்காணிக்கப்பட்டு வருவதாகவும் தெரிவிக்கப்பட்டது. இச்சூழலில், தமிழக முதலமைச்சரும் தவெக தலைவருமான விஜய், இன்று நேரில் மருத்துவமனைக்குச் சென்று வி.எஸ்.பாபுவின் நலம் குறித்து விசாரித்தார்.
மருத்துவமனைக்குச் சென்ற முதலமைச்சர் விஜய், அங்கு வி.எஸ்.பாபுவுக்கு அளிக்கப்பட்டு வரும் மருத்துவ சிகிச்சைகள், வழங்கப்பட்டு வரும் மருந்துகள் மற்றும் அவரது உடல்நலத்தில் ஏற்பட்டுள்ள முன்னேற்றங்கள் குறித்து சிகிச்சையளிக்கும் மருத்துவ வல்லுநர்கள் குழுவிடம் விரிவாகக் கேட்டறிந்தார். மேலும், அவருக்குச் சிறந்த உயர்தர மருத்துவச் சிகிச்சைகள் எவ்வித தடையுமின்றி முழுமையாகக் கிடைப்பதை உறுதி செய்ய வேண்டும் என்றும், அவர் விரைவில் பூரண குணமடைந்து இயல்பு வாழ்க்கைக்குத் திரும்பித் தனது மக்கள் பணிகளைத் தொடர்வதற்குத் தேவையான அனைத்து வசதிகளையும் முன்னெடுக்குமாறும் மருத்துவர்களுக்கு அறிவுறுத்தினார்.
முன்னதாக, கொளத்தூர் எம்.எல்.ஏ வி.எஸ்.பாபு மருத்துவமனையில் அனுமதிக்கப்பட்டுத் தீவிர சிகிச்சை பெற்று வந்த நிலையில், முதலமைச்சர் அவரை நேரில் சென்று பார்க்காதது குறித்துப் பல்வேறு விமர்சனங்கள் எழுந்தன. எனினும், முதலமைச்சர் விஜய் ஏற்கனவே தொலைபேசி வாயிலாக நலம் விசாரித்ததாக தவெக அமைச்சர்கள் தெரிவித்திருந்தனர். இந்த நிலையில், 14 நாட்களுக்குப் பிறகு முதலமைச்சர் விஜய் நேரில் சென்று வி.எஸ்.பாபுவைச் சந்தித்து நலம் விசாரித்துள்ளது குறிப்பிடத்தக்கது.