தமிழ்நாட்டில் கல்வி விருது வழங்கும் விழாக்களும், அதில் பின்பற்றப்படும் நடைமுறைகளும் எப்போதும் சமூக அளவில் பெரும் விவாதப் பொருளாகவே இருந்து வருகின்றன. அந்த வகையில், தமிழக வெற்றிக் கழகம் சார்பில் அண்மையில் நடத்தப்பட்ட கல்வி விருது விழா, தற்போதைய அரசியல் சூழலிலும் கல்வியாளர்கள் மத்தியிலும் பலமான விமர்சனங்களை எழுப்பியுள்ளது. கடந்த இரண்டு ஆண்டுகளாகக் கட்சி சார்பில் விமரிசையாக நடத்தப்பட்ட இந்த விழா சமூக வலைதளங்களில் டிரெண்டான நிலையில், இம்முறை ஆளுங்கட்சியாக இருந்து நடத்தப்பட்ட விழா பள்ளிக்கல்வித்துறையின் நீண்டகாலக் கொள்கை முடிவுக்கு முரணாக அமைந்திருப்பதாகக் குற்றச்சாட்டுகள் முன்வைக்கப்படுகின்றன.
இந்தச் சர்ச்சையின் தொடக்கப் புள்ளியாக அமைந்தது 12-ஆம் வகுப்பு பொதுத்தேர்வில் மாநில அளவில் முதலிடம் பிடித்ததாகக் கூறப்படும் அரியலூரைச் சேர்ந்த மாணவி ரிக்ஷிதாவிற்கு தவெக தலைவரும் முதல்வருமான விஜய் தங்க நெக்லஸ் அணிவித்துப் பாராட்டிய நிகழ்வுதான். இந்த அறிவிப்பை மேடையில் நேரடியாக வெளியிட்டவர் பள்ளிக்கல்வித்துறை அமைச்சர் ராஜ்மோகன். மாநில அளவில் முதலிடம் பிடித்த மாணவியை அரசுப் பொறுப்பில் உள்ள அமைச்சரே பகிரங்கமாக அறிவித்ததும், அதற்கு முதல்வர் கௌரவம் அளித்ததும் பள்ளிக்கல்வித்துறையின் அதிகாரப்பூர்வ நடைமுறையை மீறும் வகையில் அமைந்திருப்பதாக விமர்சகர்கள் சுட்டிக்காட்டுகின்றனர்.
தமிழ்நாட்டில் கடந்த 2017-ஆம் ஆண்டு முதல் பொதுத்தேர்வுகளில் மாநில அளவிலோ அல்லது மாவட்ட அளவிலோ தரவரிசை மற்றும் முதலிடம் பிடித்த மாணவர்களின் விவரங்களை வெளியிடக் கூடாது என்ற கொள்கை முடிவைப் பள்ளிக்கல்வித்துறை உறுதியாகப் பின்பற்றி வருகிறது. பெற்றோர்கள், சமூக ஆர்வலர்கள் மற்றும் கல்வியாளர்களின் தொடர் போராட்டத்திற்குப் பிறகே அரசு இந்த நிலைக்கு வந்தது. தரவரிசை விளம்பரங்களால் தனியார் கல்வி நிறுவனங்களுக்கிடையே உருவான ஆரோக்கியமற்ற போட்டியைக் கட்டுப்படுத்தவும், இதனால் மாணவர்களுக்கு ஏற்படும் தேவையற்ற மன அழுத்தத்தைத் தவிர்க்கவுமே இத்தகைய மாற்றம் கொண்டுவரப்பட்டது.
குறிப்பாக, 2017-இல் இந்தத் தரவரிசை வெளியீட்டுத் தடை நடைமுறையைக் கொண்டுவந்த அன்றைய பள்ளிக்கல்வித்துறை அமைச்சர் செங்கோட்டையன், தற்போது தவெக-விலேயே அங்கமாக இருக்கிறார். இத்தகையதொரு கல்வித்துறை கொள்கை மற்றும் அதன் பின்னணியில் உள்ள சமூக நோக்கம் குறித்து அவர் கட்சித் தலைமைக்கு உரிய வழிகாட்டுதலை வழங்கியிருக்க வேண்டும் என்ற கருத்தும் வலுத்து வருகிறது. அரசின் கொள்கை முடிவைச் செயல்படுத்த வேண்டிய இடத்தில் இருக்கும் அமைச்சரும், முதல்வரும் இதனை உணராமல் செயல்பட்டது பல தரப்பினரையும் வியப்பில் ஆழ்த்தியுள்ளது.
கல்வி என்பது வணிகப் போட்டியாகவோ அல்லது தனிநபர் விளம்பரத்திற்கான தளமாகவோ மாறக் கூடாது என்பதற்காகவே பல போராட்டங்களுக்குப் பின் இந்த முற்போக்கான நடைமுறை சாத்தியமானது. எனவே, மாணவர்களின் மனநலனையும் கல்விச் சூழலின் ஆரோக்கியத்தையும் கருத்தில் கொண்டு, முதல்வர் விஜய் இந்த விவகாரத்தில் கவனம் செலுத்த வேண்டும் என்று கல்வியாளர்கள் வலியுறுத்துகின்றனர். வருங்காலங்களில் தவெக சார்பில் கல்வி விருது விழாக்கள் நடத்தப்பட்டால், அரசின் கொள்கை நடைமுறைகளுக்கு மதிப்பளிக்கும் வகையிலும், மாணவர்களுக்கு மன அழுத்தம் தராத மாற்று வழிகளிலும் அதனைத் திட்டமிட்டு நடத்த வேண்டும் என்பதே அனைவரின் எதிர்பார்ப்பாக உள்ளது.