தூய்மைப் பணியாளர்களின் நியாயமான கோரிக்கைகளுக்கு விரைவில் தீர்வு காணப்படும் என்றும், மக்கள் நலன் சார்ந்த இந்த அரசில் அவர்களின் உரிமைகள் முழுமையாகப் பாதுகாக்கப்படும் என்றும் தமிழக அரசு உறுதியளித்துள்ளது. சென்னை மாநகராட்சி அலுவலகமான ரிப்பன் கட்டடக் கிழக்குப் பகுதி வாயிலில், பணி நிரந்தரம் மற்றும் ஊதிய உயர்வு உள்ளிட்ட பல்வேறு கோரிக்கைகளை வலியுறுத்தித் தூய்மைப் பணியாளர்கள் கடந்த 15 நாட்களாகத் தொடர் போராட்டத்தில் ஈடுபட்டு வருகின்றனர். தங்கள் கோரிக்கை மனுக்களை முதல்வர் விஜய்யிடம் நேரடியாக வழங்க நேரம் ஒதுக்க வேண்டும் என்பதும் அவர்களின் முக்கிய கோரிக்கைகளில் ஒன்றாக உள்ளது.
இப்போராட்டத்தில் ஈடுபட்டுள்ள தூய்மைப் பணியாளர்களை அமைச்சர்கள் என். ஆனந்த், ஆதவ் அர்ஜுனா, சிடிஆர் நிர்மல் குமார், மற்றும் ராஜ்மோகன் ஆகியோர் இன்று நேரில் சந்தித்துப் பேச்சுவார்த்தை நடத்தினர். போராட்டம் நடத்தி வரும் பணியாளர்கள் மத்தியில் பேசிய அமைச்சர் ஆதவ் அர்ஜுனா, தூய்மைப் பணியாளர்கள் சாலையில் அமர்ந்து போராடுவதைப் பார்த்து முதல்வர் மிகுந்த வருத்தமடைந்துள்ளதாகத் தெரிவித்தார். மேலும், “நீங்கள் இங்கு போராட்டத்தில் இருக்கும்போது எங்கள் முதல்வருக்குத் தூக்கமே வருவதில்லை; உங்களைப் பார்க்கும் போதெல்லாம் உங்களுக்கு நன்மையளிக்கும் வகையில் ஏதேனும் செய்ய வேண்டும் என்றே தொடர்ந்து கூறி வருகிறார்” எனத் உருக்கமாகப் பதிவிட்டார்.
கடந்த ஆட்சிக் காலங்களில் போராட்டங்கள் நடத்த அனுமதி மறுக்கப்பட்டு, இரவோடு இரவாகப் போராட்டத்தில் ஈடுபட்டவர்கள் அப்புறப்படுத்தப்பட்ட நிகழ்வுகளைச் சுட்டிக்காட்டிய அமைச்சர், தற்போதைய ஆட்சியில் ஜனநாயக உரிமைக்கு முழு மதிப்பு அளிக்கப்படுவதாகத் தெரிவித்தார். போராட்டத்தில் ஈடுபடும் தூய்மைப் பணியாளர்கள் மீது எவ்வித அதிகாரப் பிரயோகமும் செய்யக் கூடாது என்றும், யாரையும் மிரட்டவோ அல்லது அவர்கள் மீது கை வைக்கவோ கூடாது என்றும் அதிகாரிகளுக்கு முதல்வர் கண்டிப்பான உத்தரவைப் பிறப்பித்துள்ளதைச் சுட்டிக்காட்டினார். இது மக்களின் ஆட்சி என்றும், அரசின் கதவுகள் தூய்மைப் பணியாளர்களின் கோரிக்கைகளுக்காக எப்போதுமே திறந்திருக்கும் என்றும் அவர் நம்பிக்கை தெரிவித்தார்.
முந்தைய ஆட்சியில் கடன்கள் வாங்கி ஊழல் செய்த நிலைக்கு மாறாக, தற்போதைய அரசு கடன் வாங்கியாவது மக்களுக்குச் சிறப்பான சேவைகளை வழங்கி வருவதாக அமைச்சர் ஆதவ் அர்ஜுனா குறிப்பிட்டார். அவுட்சோர்சிங் முறைகளில் முன்பு நடந்த முறைகேடுகளைச் சுட்டிக்காட்டிய அவர், தூய்மைப் பணியாளர்களின் நலனைக் கருத்தில் கொண்டு அரசுக்குச் சற்று அவகாசம் அளிக்குமாறு கேட்டுக்கொண்டார். பணியாளர்கள் அனைவரும் போராட்டத்தைக் கைவிட்டுத் தங்களது குடும்பத்தினருடன் நிம்மதியாக இருக்க வேண்டும் என்பதே அரசின் முதன்மையான விருப்பம் என்றும், அவர்களின் கோரிக்கைகள் நிச்சயம் நிறைவேற்றப்படும் என்றும் அவர் உறுதியளித்தார்.