சீனாவைச் சேர்ந்த யூடியூபர் ஒருவர் டெல்லியில் பெண்களின் பாதுகாப்பு குறித்து சமூக வலைத்தளங்களில் பரவி வரும் கருத்துக்களை அடிப்படையாகக் கொண்டு ஒரு சமூக சோதனையை நடத்தினார். இதற்காக அவர் பெண் வேடமிட்டு, ஒப்பனை செய்து கொண்டு டெல்லியின் நெரிசல் மிகுந்த வீதிகளில் வலம் வந்தார். ஆரம்பத்தில், பெண்களைப் போல உடை அணிந்திருப்பதன் மூலம் ஒரு பெண் எவ்வளவு கவனத்தைப் பெறுகிறார் என்பதை அறியும் நோக்கத்தில் அவர் சில ஆண்களிடம் தானாக முன்வந்து உரையாடினார்.
ஆனால், இந்தச் சோதனை விரைவில் எதிர்பாராத திருப்பத்தை சந்தித்தது. யூடியூபரின் கூற்றுப்படி, பல ஆண்கள் அவரை நீண்ட தூரம் பின்தொடர்ந்தனர், மேலும் தங்கள் வீடுகளுக்கோ அல்லது ஓட்டல்களுக்கோ வருமாறு வற்புறுத்தினர். ஒரு கட்டத்தில், இரண்டு நபர்கள் அவரை தங்கள் வாகனத்தில் ஏறுமாறு வற்புறுத்தி ஏற்றியுள்ளனர். அந்த வாகனத்திற்குள் நிலைமை மோசமடைந்ததாகவும், அவர்களில் ஒருவர் கிட்டத்தட்ட தனது பேண்ட்டை கழற்ற முயன்றதாகவும் அந்த யூடியூபர் அதிர்ச்சியுடன் தெரிவித்துள்ளார். நிலைமை கைமீறிப் போவதைக் கண்ட அவர், தனது உண்மையான குரலை வெளிப்படுத்தி, அவர்களை வாகனத்தை நிறுத்தும்படி கூச்சலிட்டுள்ளார்.
இந்தச் சம்பவம் குறித்து முடிவில் பேசிய அந்த யூடியூபர், தான் வெறும் சோதனைக்காகப் பெண் வேடமிட்டிருந்ததால், சோதனை முடிந்தவுடன் தனது ஆடைகளை மாற்றி பாதுகாப்பாகத் திரும்பிவிட்டதாகக் கூறினார். ஆனால், உண்மையான பெண்களுக்கு இது அன்றாட வாழ்க்கை என்றும், அவர்கள் தொடர்ந்து இத்தகைய தேவையற்ற கவனத்தையும் பாதுகாப்பு அச்சுறுத்தல்களையும் எதிர்கொள்ள வேண்டியிருப்பதாகவும் வேதனையுடன் தெரிவித்தார். மேலும், இதுபோன்ற ஆபத்தான சோதனைகளை யாரும் முயற்சிக்க வேண்டாம் எனவும் அவர் எச்சரித்துள்ளார். எனினும், அந்த யூடியூபரே பலரைத் தூண்டும் வகையில் நடந்துகொண்டதால், இந்தச் சம்பவங்கள் எந்தளவுக்கு தன்னிச்சையாக நடந்தவை என்ற கேள்வியும் எழுந்துள்ளது.