விழுப்புரம் மாவட்டத்தைச் சேர்ந்த கிராமப்புற இளைஞர்கள் மற்றும் பெண்களுக்கு ஒரு சிறந்த சுயவேலைவாய்ப்பு வாய்ப்பாக, இந்தியன் வங்கி ஊரக சுயவேலைவாய்ப்பு பயிற்சி நிறுவனம் (RSETI) சார்பில் 30 நாட்கள் இலவச செல்போன் பழுதுபார்த்தல் மற்றும் சர்வீஸ் பயிற்சி அறிவிக்கப்பட்டுள்ளது. மத்திய அரசின் ‘ஸ்கில் இந்தியா’ திட்டத்தின் கீழ் வழங்கப்படும் இந்தப் பயிற்சியை முடிப்பவர்களுக்குத் தேசிய திறன் மேம்பாட்டு தரச் சான்றிதழ் வழங்கப்படும். பயிற்சியின் போது காலை, மாலை தேநீர் மற்றும் மதிய உணவுடன், பயிற்சிக்குத் தேவையான உபகரணங்களும் முற்றிலும் இலவசமாக வழங்கப்படுவது குறிப்பிடத்தக்கது.
இந்தப் பயிற்சியில் சேர விழுப்புரம் மாவட்டத்தைச் சேர்ந்த 18 முதல் 50 வயதுக்குட்பட்ட கிராமப்புற இளைஞர்கள் மற்றும் பெண்கள் விண்ணப்பிக்கலாம். குறைந்தபட்சக் கல்வித்தகுதியாக 8-ஆம் வகுப்பு தேர்ச்சி பெற்றிருக்க வேண்டும். பயிற்சியை வெற்றிகரமாக நிறைவு செய்பவர்கள் சொந்தமாகத் தொழில் தொடங்கத் தேவையான வங்கி கடன் ஆலோசனைகள் மற்றும் தொழில்முனைவோர் மேம்பாட்டுப் பயிற்சி (EDP) போன்ற வழிகாட்டுதல்களும் நிறுவனத்தின் சார்பில் வழங்கப்படும்.
விண்ணப்பதாரர்களுக்கான நேர்முகத் தேர்வு ஏப்ரல் 11, 2026 (சனிக்கிழமை) அன்று நடைபெறுகிறது. இதில் தேர்ந்தெடுக்கப்பட்டவர்களுக்கு ஏப்ரல் 15, 2026 முதல் தினசரி காலை 9.30 மணி முதல் மாலை 5.30 மணி வரை பயிற்சி வகுப்புகள் தொடங்கும். விண்ணப்பிக்க விரும்பும் ஆர்வலர்கள் ஆதார் அட்டை, வாக்காளர் அடையாள அட்டை, குடும்ப அட்டை, கல்விச்சான்றிதழ், வங்கி கணக்கு புத்தகம் மற்றும் முன்னுரிமை பெற 100 நாள் வேலைத் திட்ட அட்டை ஆகிய ஆவணங்களுடன் நேரில் வர வேண்டும்.
விருப்பமுள்ளவர்கள் விழுப்புரம் மாம்பழப்பட்டு சாலையில், E.S. மெட்ரிக் பள்ளி எதிரில் அமைந்துள்ள இந்தியன் வங்கி ஊரக சுயவேலைவாய்ப்பு பயிற்சி நிறுவனத்தில் விண்ணப்பப் படிவத்தைப் பெற்று சமர்ப்பிக்கலாம். இது குறித்த கூடுதல் விவரங்கள் தேவைப்படுவோர் 04146-294115 அல்லது 7598466681 என்ற தொலைபேசி எண்களைத் தொடர்பு கொண்டு தங்களது சந்தேகங்களைத் தீர்த்துக் கொள்ளலாம். தமிழக அரசு மற்றும் மத்திய அரசின் இந்த ஒருங்கிணைந்த திட்டத்தைப் பயன்படுத்தி இளைஞர்கள் தங்கள் வாழ்வாதாரத்தை மேம்படுத்திக் கொள்ள இது ஒரு நல்வாய்ப்பாகும்.