கேப்டன் ரசிகர்களே பண்டிகைக்கு தயாராகுங்கள்…. அடுத்தடுத்து ரெண்டு சூப்பர் ஹிட் படம் ரி ரிலீஸ்!

தமிழ் சினிமாவில் 80 களிலும், 90 களிலும் மிகப்பெரிய ஆக்‌ஷன் ஹீரோவாக வலம் வந்தவர் விஜயகாந்த். அவர் நடித்த ஊமை விழிகள், கேப்டன் பிரபாகரன், புலன் விசாரணை, வானத்தைப் போல, சின்னக்கவுண்டர் மற்றும் ரமணா உள்ளிட்ட படங்கள் எல்லாம் பிளாக்பஸ்டர் ஹிட்களாக அமைந்தன.

எம் ஜி ஆர் போலவே விஜயகாந்தும் திரையில் நடிக்கும் போது சில கொள்கைகளை கடைபிடித்தார். பெரும்பாலும் மது மற்றும் சிகரெட் குடிக்கும் காட்சிகளில் நடிக்க மறுத்துவிடுவார். அதுபோல பெண்கள் மற்றும் வயதானவர்களை அவமரியாதை செய்வது போலவோ அல்லது அடிப்பது போன்ற காட்சிகளிலோ நடிக்க மாட்டார். அந்தளவுக்கு இமேஜை மெய்ண்டெய்ன் செய்து வந்தார். விஜயகாந்த் கருப்பாக இருந்த காரணத்தால் அவரோடு ஜோடியாக நடிக்க முதலில் நடிகைகள் மறுத்தார்கள்.

ஆனாலும் தனக்கென ஒரு பாணியை உருவாக்கிக் கொண்டு 80 களிலும் 90 களிலும் பிஸியான நடிகராக வலம் வந்தார். 2000 களுக்குப் பிறகு அரசியலுக்கு சென்ற அவர் சினிமாவில் நடிப்பதைக் குறைத்தார். உடல்நலப் பாதிப்பு ஏற்பட்டு கடந்த 2023 ஆம் ஆண்டு மறைந்தார். அவர் மறைந்து இரண்டு ஆண்டுகள் ஆகிவிட்டாலும் இன்னமும் அவர் பற்றி பலரும் பல நல்ல விஷயங்களைப் பகிர்ந்துகொண்டு வருகின்றனர்.

அந்த அளவுக்கு எல்லோரிடமும் நல்ல பெயர் பெற்ற ஒரு மனிதராக விஜயகாந்த் வாழ்ந்து மறைந்துள்ளார். இந்நிலையில் விஜயகாந்தின் ரசிகர்களுக்கு மகிழ்ச்சியான செய்தி ஒன்று வெளியாகியுள்ளது. சொல்லப் போனால் ஒன்றல்ல இரண்டு. விஜயகாந்த் நடிப்பில் வெளியாகி சூப்பர் ஹிட்டான ‘கேப்டன் பிரபாகரன்’ திரைப்படம் 34 ஆண்டுகளுக்குப் பிறகு 4K ரெசல்யூஷனில் ரி ரிலீஸாகவுள்ளது. அதே போல மற்றொரு சூப்பர் ஹிட்டான ‘வல்லரசு’ திரைப்படம் ரி ரிலீஸாக உள்ளதாக அறிவிக்கப்பட்டுள்ளது.