தமிழக அரசியல் களம் அடுத்தடுத்துப் புதிய திருப்பங்களைச் சந்தித்துக் கொண்டிருக்கும் வேளையில், அதிமுக பொதுச்செயலாளரும், எதிர்க்கட்சித் தலைவருமான எடப்பாடி கே. பழனிசாமி வெளியிட்டுள்ள அதிரடி விளக்கங்கள் கோட்டை வட்டாரங்களை உலுக்கியெடுத்துள்ளன. “திமுகவின் வாரிசு அரசியலைத் தீவிரமாக எதிர்க்கும் அதிமுகவில், அடுத்த தலைமுறையாக இ.பி.எஸ்-ஸின் மகன் மிதுன் குமார் களம் இறக்கப்படுகிறாரா?” என்று ஊடகங்களில் காட்டுத்தீயாகப் பரவிய செய்திகளுக்கு, சட்டமன்றக் கூட்டத்தொடர் முடிவில் முற்றுப்புள்ளி வைத்துள்ளார் எடப்பாடி பழனிசாமி. மிதுன் குமாருக்குக் கட்சியின் இளைஞரணி அல்லது ஐடி விங்கில் முக்கியப் பதவி கொடுக்கப்படலாம் என்று வெளியான தகவல்களை அவர் மிகத் திட்டவட்டமாக மறுத்துள்ளார்.
“என் மகன் அரசியலுக்கு வரமாட்டான்; அவர் அரசியலுக்கு வரப்போகிறார் எனச் சில ஊடகங்களில் வெளியாகும் செய்திகள் முற்றிலும் தவறானவை மற்றும் திட்டமிட்டு பரப்பப்படும் வதந்திகள்” என்று காரசாரமாக விளக்கியுள்ளார் இ.பி.எஸ். மேலும், தனது மகன் அதிமுகவில் ஒரு சாதாரண அடிப்படை உறுப்பினராக மட்டுமே உள்ளார் என்றும், அவர் கட்சியில் எந்தப் பதவியிலும் இல்லை, எதிர்காலத்திலும் தீவிர அரசியலுக்கு வரமாட்டார் என்பதை மீண்டும் மிகவும் அழுத்தமாகத் தெரிவித்துக் கொள்வதாகவும் கூறி வாரிசு அரசியல் சர்ச்சைகளுக்கு அவர் முற்றுப்புள்ளி வைத்துள்ளார்.
மறுபுறம், தமிழகத்தில் சட்டம் ஒழுங்கு முற்றிலும் சீர்குலைந்துவிட்டதாக தவெக அரசு மீது எடப்பாடி பழனிசாமி மிகக் கடுமையான குற்றச்சாட்டுகளை முன்வைத்தார். ஆட்சிப் பொறுப்பேற்ற வெறும் 38 நாட்களில் தமிழ்நாட்டில் 130 கொலைகளும், 150-க்கும் மேற்பட்ட பாலியல் வழக்குகளும் பதிவாகியுள்ளன எனச் சுட்டிக்காட்டிய அவர், பெண்களின் பாதுகாப்புக்காகப் பிரம்மாண்டமாக அறிவிக்கப்பட்ட ‘சிங்கப்பெண் சிறப்புப் படைக்கே’ தனியாக ஒரு பாதுகாப்பு தேவைப்படும் அவல நிலைதான் இன்று நிலவுகிறது என்று கிண்டலடித்தார். தேர்தல் களத்தில் தவெக கொடுத்த கவர்ச்சிகரமான வாக்குறுதிகளான ஆண்டுக்கு 6 இலவச சிலிண்டர்கள், அண்ணன் சீர் திட்டம், மற்றும் தங்க மோதிரம் போன்ற திட்டங்கள் என்ன ஆனது? என்று கேள்வி எழுப்பிய அவர், புதிய அரசு மக்களை ஏமாற்றி வருவதாகக் குற்றம் சாட்டினார்.
இறுதியாக, சி.வி.சண்முகம் தனது எம்எல்ஏ பதவியை ராஜினாமா செய்ய இருப்பதாக வரும் தகவல்கள் மற்றும் கூட்டணி குறித்த சர்ச்சைகளுக்கும் அவர் பதிலளித்தார். பாமக தயவால்தான் அதிமுக எம்எல்ஏக்கள் வெற்றி பெற்றிருப்பதாகக் கூறும் சி.வி.சண்முகம், பாமக வலிமையாக இருக்கும் விழுப்புரம் தொகுதியில் கடந்த 2021 ஆம் ஆண்டு நடந்த தேர்தலில் ஏன் தோற்றார்? என்று கேள்வி எழுப்பினார். அதிமுக தலைமை சரியாக இருந்த காரணத்தால்தான் சி.வி.சண்முகத்தால் முன்பு வெற்றி பெற முடிந்தது என்றும், கூட்டணியில் குழப்பத்தை ஏற்படுத்தவே சண்முகம் இவ்வாறு பேசியிருக்கிறார் என்றும் எடப்பாடி பழனிசாமி மிக வெளிப்படையாகத் தெரிவித்துள்ளார்.