“எங்கள் நாட்டு மக்கள் தெருவில் நிற்பதா?” துபாயில் தவித்த இந்தியர்களுக்காக 64 அடுக்குமாடி கட்டடத்தையே கொடுத்த தொழிலதிபர்.. குவியும் பாராட்டுக்கள்..!!

மத்திய கிழக்கில் நிலவி வரும் போர் பதற்றம் மற்றும் வான்வெளி கட்டுப்பாடுகள் காரணமாக துபாயில் ஏராளமான இந்தியப் பயணிகள் நாடு திரும்ப முடியாமல் தவித்தனர். விமானச் சேவைகள் ரத்து செய்யப்பட்டதால், தங்குவதற்கு இடமின்றியும் ஹோட்டல் கட்டணங்களைச் செலுத்த முடியாமலும் தவித்த இந்தியர்களுக்கு உதவ, துபாயைச் சேர்ந்த இந்தியத் தொழிலதிபர் யோகேஷ் தோஷி (Yogesh Doshi) முன்வந்துள்ளார். அல் மிஜான் குழுமத்தின் (Al Mizan Group) தலைவரான இவர், தனது நிறுவனத்திற்குச் சொந்தமான 64 அடுக்குமாடி குடியிருப்புகள் கொண்ட முழு கட்டடத்தையும் பாதிக்கப்பட்ட இந்தியர்களின் தங்குமிடத்திற்காக வழங்கியுள்ளார்.

இந்த மனிதாபிமான நடவடிக்கையின் மூலம், துபாயில் தவித்து வரும் இந்தியக் குடும்பங்களுக்கு இலவச தங்குமிடம் மற்றும் அத்தியாவசியத் தேவைகள் பூர்த்தி செய்யப்படுகின்றன. ஹோட்டல்களில் தங்குவதற்குப் போதிய வசதி இல்லாதவர்கள் மற்றும் பொருளாதார ரீதியாகப் பாதிக்கப்பட்டவர்களுக்கு இந்தத் தங்குமிடம் ஒரு பெரிய நிம்மதியை அளித்துள்ளது. இந்த குடியிருப்புகளில் தங்கியுள்ளவர்கள் தங்களின் பாதுகாப்பு உறுதி செய்யப்பட்டுள்ளதாகவும், இந்தியத் தூதரகம் மற்றும் தொழிலதிபர் யோகேஷ் தோஷி ஆகியோரின் உதவியால் மிகுந்த ஆறுதல் அடைந்துள்ளதாகவும் நெகிழ்ச்சியுடன் தெரிவித்துள்ளனர்.

இதேபோல், அஜ்மானைச் சேர்ந்த மற்றொரு இந்தியத் தொழிலதிபர் தீரஜ் ஜெயின் (Dhiraj Jain) என்பவரும் தனது 80,000 சதுர அடி பண்ணை வீட்டைப் பாதிக்கப்பட்ட பயணிகளுக்காகத் திறந்து விட்டுள்ளார். அவர் சுமார் 200-க்கும் மேற்பட்ட பயணிகளுக்கு இலவச உணவு மற்றும் தங்குமிடம் வழங்கியதுடன், அவர்கள் தங்குமிடத்தை அடைய தனது சொகுசு கார்கள் மூலம் பிக்கப் (Pickup) வசதியையும் செய்துகொடுத்தார். இக்கட்டான சூழலில் இந்தியத் தொழிலதிபர்கள் காட்டியுள்ள இந்த உதவிக்கரம், உலகெங்கிலும் உள்ள இந்தியர்களிடையே பெரும் பாராட்டுகளைப் பெற்று வருகிறது.