மயிரிழையில் எஸ்கேப்!… அந்தரத்தில் துடிதுடித்த உயிர்… வானில் இருந்து விழுந்த பாராகிளைடர்… உறைந்துபோன சுற்றுலா பயணிகள்…!!

இமாச்சலப் பிரதேசத்தின் காங்ரா மாவட்டத்தில் உள்ள பிரசித்தி பெற்ற பீர்-பில்லிங் பகுதியில் பாராகிளைடிங் சாகசத்தில் ஈடுபட்டிருந்த போது நிகழ்ந்த எதிர்பாராத விபத்தில், பல்கேரிய நாட்டைச் சேர்ந்த சுற்றுலாப் பயணி ஒருவர் பரிதாபமாக உயிரிழந்தார். வானில் பறந்து கொண்டிருந்தபோது பலத்த காற்று காரணமாக கட்டுப்பாட்டை இழந்த கிளைடர், மலைப்பாங்கான கரடுமுரடான நிலப்பரப்பில் மோதி விபத்துக்குள்ளானதாகக் கூறப்படுகிறது. தகவலறிந்து சம்பவ இடத்திற்கு விரைந்த பேரிடர் மீட்புக் குழுவினர் தீவிர தேடுதல் வேட்டை நடத்தி, படுகாயங்களுடன் சடலமாகக் கிடந்த அந்நாட்டுப் பயணியின் உடலை மீட்டனர்.

அதே சமயம், மற்றொரு பாராகிளைடரில் பயணித்து விபத்தில் சிக்கிய மற்றொரு வெளிநாட்டு சுற்றுலாப் பயணியை மீட்புக் குழுவினர் தக்க சமயத்தில் உயிருடன் மீட்டனர். லேசான காயங்களுடன் மீட்கப்பட்ட அவருக்கு அருகிலுள்ள மருத்துவமனையில் முதலுதவி மற்றும் அவசர சிகிச்சை அளிக்கப்பட்டு வருகிறது. இச்சம்பவம் குறித்து உள்ளூர் காவல்துறையினர் வழக்குப் பதிவு செய்து, பாராகிளைடிங் ஆபரேட்டர்கள் உரிய பாதுகாப்பு விதிமுறைகளைப் பின்பற்றினார்களா மற்றும் பாதகமான வானிலை முன்னறிவிப்பு புறக்கணிக்கப்பட்டதா என்பது குறித்து தீவிர விசாரணை நடத்தி வருகின்றனர்.