ஹைதராபாத் அருகே உள்ள அல்மாஸ்குடா பகுதியில், பி.ஆர். அம்பேத்கர் சிலை அமைந்திருக்கும் இடத்தின் அருகில் இரண்டு இளம் பெண்கள் சிலர் மீது கொடூர தாக்குதல் நடத்திய அதிர்ச்சி சம்பவம் நிகழ்ந்துள்ளது. அந்த வழியே சென்று கொண்டிருந்த இரண்டு பெண்களை வழிமறித்த சிலர், அவர்களை தகாத வார்த்தைகளால் திட்டியும், பாலியல் தொழிலாளர்கள் என்று கூறி தவறான குற்றச்சாட்டுகளை சுமத்தியும் தாக்கியுள்ளனர். இந்த ஒட்டுமொத்த சம்பவமும் வீடியோவாக பதிவு செய்யப்பட்டு தற்போது சமூக வலைதளங்களில் வேகமாகப் பரவி வருகிறது.
தாக்குதலுக்கு ஆளான பெண்கள், தாங்கள் தங்கள் அத்தையைச் சந்திப்பதற்காகவே அப்பகுதிக்கு வந்ததாகத் தொடர்ந்து கதறி அழுது மன்றாடியுள்ளனர். இருப்பினும், தாக்குதல் நடத்தியவர்கள் அதைப் பொருட்படுத்தாமல், அந்தப் பெண்கள் சிறுவர்களுக்கு சாக்லேட்டுகளைக் கொடுத்து மதமாற்ற நடவடிக்கைகளில் ஈடுபடுவதாக மேலும் ஒரு பழிசுமத்தியுள்ளனர். பொதுவெளியில் எந்தவித பயமும் இன்றி அவர்கள் நடத்திய இந்த வன்முறை அப்பகுதி மக்களிடையே பெரும் அதிர்ச்சியையும் கொந்தளிப்பையும் ஏற்படுத்தியுள்ளது.
https://twitter.com/revathitweets/status/2117802413352742938/video/1
இந்தக் கொடூரச் சம்பவம் கடந்த மாதம் மகேஸ்வரம் பகுதிக்கு உட்பட்ட இடத்தில் நடந்துள்ளதாகத் தகவல்கள் தெரிவிக்கின்றன. பெண்களின் கதறலையும் மீறி அடையாளம் தெரியாத நபர்கள் காட்டிய இந்த துணிச்சலும் அத்துமீறலும் அப்பகுதியில் சட்ட ஒழுங்கு குறித்த கேள்விகளை எழுப்பியுள்ளது. தற்போது வைரலாகி வரும் வீடியோ ஆதாரத்தின் அடிப்படையில், இந்த அநியாயத்தில் ஈடுபட்ட நபர்கள் மீது காவல்துறை உரிய நடவடிக்கை எடுக்க வேண்டும் எனப் பொதுமக்கள் கோரிக்கை விடுத்து வருகின்றனர்.