தென்காசி மாவட்டம் ஆலங்குளத்தைச் சேர்ந்த ஆகாஷ் (23) என்பவரும், நெல்லை மாவட்டம் அரியநாயகிபுரத்தைச் சேர்ந்த சுஷ்மிதா (21) என்பவரும் வெவ்வேறு சமூகத்தைச் சேர்ந்தவர்கள். கல்லூரி படிப்பை முடித்த இவர்கள் இருவரும் காதலித்து வந்த நிலையில், சுஷ்மிதாவின் வீட்டில் கடும் எதிர்ப்பு கிளம்பியது. எதிர்ப்பையும் மீறி இருவரும் கடந்த 3 மாதங்களுக்கு முன்பு திருமணம் செய்து கொண்டு, பாவூர்சத்திரம் அருகே உள்ள சிவகாமிபுரத்தில் வாடகை வீட்டில் வசித்து வந்தனர்.
இந்நிலையில், நேற்று நள்ளிரவில் சுஷ்மிதாவின் தந்தை முருகன் என்பவர் ரகசியமாக மோட்டார் சைக்கிளில் சிவகாமிபுரத்தில் உள்ள இவர்களது வீட்டிற்கு வந்துள்ளார். வீட்டின் கதவைத் திறந்து உள்ளே புகுந்த முருகன், தான் மறைத்து வைத்திருந்த கூர்மையான அரிவாளால் மருமகன் ஆகாஷின் தலை மற்றும் கால்களில் சரமாரியாக வெட்டியுள்ளார். கணவனைக் காப்பாற்ற ஓடிவந்த சொந்த மகள் சுஷ்மிதாவிற்கும் கையில் வெட்டு விழுந்தது.
இருவரின் அலறல் சத்தம் கேட்டு அக்கம் பக்கத்தினர் ஓடி வரவும், முருகன் தான் கொண்டு வந்த பைக்கில் ஏறித் தலைமறைவானார். ரத்த வெள்ளத்தில் உயிருக்குப் போராடிய தம்பதியை மீட்ட பாவூர்சத்திரம் போலிஸார், 108 ஆம்புலன்ஸ் மூலம் அவர்களைத் திருநெல்வேலி அரசு மருத்துவக் கல்லூரி மருத்துவமனைக்கு அனுப்பி வைத்தனர். அங்கு ஆகாஷ் தீவிர சிகிச்சை பிரிவில் சேர்க்கப்பட்டுள்ளார். இச்சம்பவம் குறித்து போலிஸார் வழக்குப் பதிவு செய்து தப்பியோடிய முருகனை தீவிரமாக வலைவீசித் தேடி வருகின்றனர்.