தெலுங்கானா மாநிலம் நாராயண்பேட் மாவட்டம், கொஸ்கி நகராட்சிக்குட்பட்ட போதிரெட்டிப்பள்ளி கிராமத்தில் நடைபெற்ற திருமண விழாவில் பெரும் சோக சம்பவம் ஒன்று அரங்கேறியுள்ளது.
திருமணக் கொண்டாட்டத்தின் ஒரு பகுதியாக அமைக்கப்பட்டிருந்த டிஜே இசையின் தீவிரமான சத்தத்திற்கு 17 வயதான ரவிதேஜா என்ற சிறுவன் உற்சாகமாக நடனமாடிக் கொண்டிருந்தார். அப்போது, அவர் எதிர்பாராதவிதமாகத் திடீரென மயங்கி கீழே சுருண்டு விழுந்தார்.
அங்கிருந்தவர்கள் அவரை உடனடியாக மீட்டு கொஸ்கி அரசு மருத்துவமனைக்குக் கொண்டு சென்றனர். ஆனால், அவரைப் பரிசோதித்த மருத்துவர்கள் அவர் ஏற்கனவே உயிரிழந்துவிட்டதாகத் தெரிவித்தனர். டிஜே இசையின் அதிகப்படியான சத்தம் காரணமாக அவருக்கு மாரடைப்பு ஏற்பட்டிருக்கலாம் எனச் சந்தேகிக்கப்படுகிறது. இந்தச் சம்பவத்தால் திருமண வீடு சோகமயமாக மாறியுள்ளதுடன், அப்பகுதி முழுவதிலும் பெரும் அதிர்ச்சியை ஏற்படுத்தியுள்ளது.