தமிழ் சினிமாவின் போக்கை மாற்றிய ஒரு சில இயக்குனர்களில் பாரதிராஜாவும் ஒருவர். அவர் இயக்கத்தில் வெளியான 16 வயதினிலே திரைப்படம் தமிழ் சினிமாவையே புரட்டி போட்டது. தொடர்ந்து ரத்தமும் சதையுமான கிராமிய மணம் கொண்ட படங்களை கொடுத்து தமிழ் சினிமா ரசிகர்களின் இதயங்களைக் கொள்ளை கொண்டார்.
அவர் தன்னை ஒரு இயக்குனராக நிலைநிறுத்திக் கொண்ட பின்னரும் தனது படங்களுக்கு முன்னணி நடிகர்களை தேடி செல்லாமல் புதுமுக நடிகர்களையே பெரும்பாலும் பயன்படுத்தினார். நடிகர்களிடம் பாரதிராஜா நடிப்பை வாங்கும் விதமே வித்தியாசமானதாக இருக்கும். அவர் படங்களில் நடித்த பெரும்பாலான நடிகர்களிடம் பாரதிராஜாவின் தாக்கம் இருக்கும்.
ஆரம்பத்தில் சினிமாவில் நடிக்க வேண்டும் என்றே பாரதிராஜா சினிமாவுக்கு வந்துள்ளார். அதற்காக மேடை நாடகங்களில் எல்லாம் நடித்துள்ளார். ஆனால் ஒரு கட்டத்தில் தன் முக அமைப்பு நடிப்பதற்கு செட் ஆகாது என முடிவு செய்து இயக்கத்தின் பக்கம் பார்வையை திருப்பினார். இடையில் அவர் நடித்த கல்லுக்குள் ஈரம் திரைப்படமும் தோல்வி அடைந்ததால் நடிப்பின் பக்கம் திரும்பவில்லை.
இதற்கிடையில் கே எஸ் ரவிக்குமார் தன்னுடைய நாட்டாமை படத்தில் விஜயகுமார் நடித்த நாட்டாமை வேடத்தில் நடிக்க முதலில் பாரதிராஜாவைதான் கேட்டாராம். ஆனால் அப்போது அவருக்கு நடிப்பில் பெரிதாக ஆர்வம் இல்லாததால் அந்த படத்தில் நடிக்க மறுத்து விட்டாராம். இதை அவரே ஒரு நேர்காணலில் பகிர்ந்துள்ளார்.
அதன் பின்னர் மணிரத்னத்தின் ஆயுத எழுத்து படத்தில் வில்லனாக நடிக்க ஆரம்பித்த இப்போது தொடர்ச்சியாக பல படங்களில் நடித்து வருகிறார். தனுஷோடு அவர் நடித்த திருச்சிற்றம்பலம் திரைப்படம் மிகப்பெரிய வெற்றியைப் பெற்றது. அந்த படத்தில் அவரின் கதாபாத்திரம் ரசிகர்களை வெகுவாகக் கவர்ந்தது.