பாரதிராஜா மட்டும் அதைப் பண்ணியிருந்தால் சிரஞ்சீவி தமிழ் சினிமாவில் ஒரு சூப்பர் ஸ்டாராக வந்திருப்பார்… ஜஸ்ட் மிஸ்ஸு!

தமிழ் சினிமாவின் போக்கை மாற்றிய ஒரு சில இயக்குனர்களில் பாரதிராஜாவும் ஒருவர். அவர் இயக்கத்தில் வெளியான 16 வயதினிலே திரைப்படம் தமிழ் சினிமாவையே புரட்டி போட்டது. தொடர்ந்து ரத்தமும் சதையுமான கிராமிய மணம் கொண்ட படங்களை கொடுத்து தமிழ் சினிமா ரசிகர்களின் இதயங்களைக் கொள்ளை கொண்டார்.

அவர் தன்னை ஒரு இயக்குனராக நிலைநிறுத்திக் கொண்ட பின்னரும் தனது படங்களுக்கு முன்னணி நடிகர்களை தேடி செல்லாமல் புதுமுக நடிகர்களையே பெரும்பாலும் பயன்படுத்தினார். அப்படிதான் அவர் தன்னுடைய கிழக்கே போகும் ரயில் படத்துக்கே பொருத்தமாக இருப்பார் என்று சுதாகரைத் தேர்வு செய்துள்ளார். அதற்கு முன்னர் அந்த படத்தில் நடிக்க சிரஞ்சீவி கூட ஆடிஷனுக்கு வந்தாராம்.

ஆனால் சிரஞ்சீவியை விட சுதாகர் அந்த கதாபாத்திரத்துக்குப் பொருத்தமாக இருந்தார் என்பதால் அவரையே தேர்வு செய்துள்ளார். அதுபற்றி பேசியுள்ள பாரதிராஜா “சிரஞ்சீவி வந்தான். ஆனால் சுதாகர் என்னை ஏமாற்றி விட்டான். அவனிடம் வேட்டியைக் கொடுத்து பாண்டி பஜாரில் நடக்க விட்டேன். பொருத்தமாக இருந்தான். அதனால் சிரஞ்சீவிக்குப் பதில் சுதாகரையே நடிக்க வைத்தேன்” என்று கூறியுள்ளார்.

ஆனால் சில ஆண்டுகளுக்குப் பிறகு சிரஞ்சீவி தெலுங்கு சினிமாவில் அறிமுகமாகி அதன் பின்னர் கொஞ்சம் கொஞ்சமாக வளர்ந்து தெலுங்கு சினிமாவின் சூப்பர் ஸ்டாரானார். ஒருவேளை பாரதிராஜா ‘கிழக்கே போகும் ரயில்’ படத்துக்கு சிரஞ்சீவியைத் தேர்வு செய்திருந்தால் அவர் தமிழ் சினிமாவிலேயே கமல், ரஜினி போல வந்திருக்கலாம்.

கிழக்கே போகும் ரயில் படத்தில் கதாநாயகனாக நடித்த சுதாகரும் பெரிய நடிகராக வரவில்லை. அதன் பின்னர் சில ஆண்டுகளில் காமெடியன் ஆகி தற்போது சினிமாவில் எங்கே இருக்கிறார் என்றே தெரியாத அளவுக்குப் போய்விட்டார்.