பெங்களூருவில் உள்ள ஃபோரம் மாலில் அமைந்துள்ள பிவிஆர் ஐநாக்ஸ் மல்டிபிளெக்ஸில் இயங்கி வந்த ஜூஸ் கடை, பயன்படுத்தப்பட்ட ஒருமுறை பயன்படுத்தும் கப்களை மீண்டும் கழுவி வாடிக்கையாளர்களுக்குப் பயன்படுத்தியதாக எழுந்த புகாரைத் தொடர்ந்து அதிரடியாக மூடப்பட்டுள்ளது. சமூக வலைதளத்தில் வைரலான ஒரு வீடியோவின் அடிப்படையில், கர்நாடக சுகாதாரத் துறையின் உணவுப் பாதுகாப்பு அதிகாரிகள் இந்தச் சோதனையை மேற்கொண்டு இந்த நடவடிக்கையை எடுத்துள்ளனர்.
கடந்த நவம்பர் 5-ஆம் தேதி மிதில் குமார் என்ற இன்ஸ்டாகிராம் பயனர் வெளியிட்ட வீடியோவில், பிவிஆர் ஐநாக்ஸ் அவுட்லெட்டில் பயன்படுத்தப்பட்ட கப்கள் மீண்டும் சேகரிக்கப்பட்டு வாடிக்கையாளர்களுக்கு ஜூஸ் வழங்கப் பயன்படுத்தப்படுவது அம்பலமானது. இந்தச் சம்பவம் இணையத்தில் பெரும் அதிர்ச்சியை ஏற்படுத்தியதுடன், பொதுமக்களிடையே உணவுப் பாதுகாப்பு மற்றும் சுகாதாரம் குறித்த கடுமையான கேள்விகளையும் கவலைகளையும் எழுப்பியது.
https://www.instagram.com/reel/DfVAgOvSW8w/?utm_source=ig_embed&ig_rid=AoZQ_laLNwDRRJfGF7-ychc
இதைத் தொடர்ந்து, கோனான்குண்டே கியூசக்ஸ் பகுதியில் உள்ள ஃபோரம் மாலில் அமைந்துள்ள இந்தக் கடையில் உணவுப் பாதுகாப்பு அதிகாரிகள் நேரில் ஆய்வு நடத்தினர். அங்கு விதிகள் மீறப்பட்டது உறுதி செய்யப்பட்டதை அடுத்து, கடைக்கு நோட்டீஸ் வழங்கப்பட்டு ஜூஸ் கவுன்டர் உடனடியாக மூடப்பட்டதாக கர்நாடக சுகாதாரத்துறை அமைச்சர் உறுதிப்படுத்தினார். மேலும், பெரிய பிராண்டுகள் முதல் சிறிய கடைகள் வரை அனைத்து உணவு வணிக நிறுவனங்களும் வாடிக்கையாளர்களின் உடல்நலனை முன்னிறுத்தி உரிய சுகாதார விதிகளையும் தரக்கட்டுப்பாடுகளையும் கடுமையாகப் பின்பற்ற வேண்டும் என அவர் எச்சரித்துள்ளார்.
இந்தச் சம்பவம் குறித்து பிவிஆர் ஐநாக்ஸ் தரப்பில் அதிகாரப்பூர்வ விளக்கம் அளிக்கப்படாத போதிலும், ஃபோரம் சவுத் பெங்களூரு நிர்வாகம் இன்ஸ்டாகிராம் பதிவின் மூலம் மன்னிப்பு கோரியுள்ளது. இந்த விவகாரம் குறித்து பிவிஆர் குழுவினர் தீவிர விசாரணை நடத்தி வருவதாகவும், எதிர்காலத்தில் இதுபோன்ற தவறுகள் நடைபெறாமல் இருப்பதை உறுதி செய்யத் தகுந்த நடவடிக்கை எடுக்கப்படும் என்றும் உறுதியளித்துள்ளது.