பிரிட்டனின் வொர்செஸ்டர்ஷைர் மாகாணம், புரோம்ஸ்கிரோவ் பகுதியைச் சேர்ந்த கேட்டி மர்பி (33) மற்றும் அவரது கணவர் ஸ்டீபன் கிர்பி தம்பதியினர், பிரசவத்திற்காக மருத்துவமனைக்குக் காரில் விரைந்துகொண்டிருந்த போது எதிர்பாராத விதமாக வழியிலேயே கேட்டிக்கு பிரசவ வலி தீவிரமடைந்தது. மருத்துவமனைக்குச் செல்ல போதுமான நேரமில்லை என்பதை உணர்ந்த ஸ்டீபன், உடனடியாக காரை அருகில் இருந்த கே.எஃப்.சி (KFC) உணவகத்தின் வாகன நிறுத்தத்தில் நிறுத்தினார். ஆம்புலன்ஸ் கட்டுப்பாட்டு அறைக்குத் தொடர்புகொண்டு தங்கள் இருப்பிடத்தைக் கூற முயன்றபோது, அவர்களுக்குத் தெரிந்த ஒரே அடையாளம் அந்த கே.எஃப்.சி உணவகம் மட்டுமே. ஆனால், ஆம்புலன்ஸ் வருவதற்கு முன்பே பிரசவம் கைமீறிச் செல்ல, காரின் பயணியர் இருக்கைக்கு விரைந்த ஸ்டீபன், பிறக்கத் தொடங்கிய தனது பச்சிளம் ஆண் குழந்தையைச் சரியான நேரத்தில் பத்திரமாகத் தாங்கிப் பிடித்தார்.
சற்று நேரத்தில் அங்கு வந்த ஆம்புலன்ஸ் ஊழியர்கள், தாயையும் சேயையும் பத்திரமாக மருத்துவமனைக்கு அழைத்துச் சென்றனர். இந்த விசித்திரமான நிகழ்வைக் கேள்விப்பட்டு ஆச்சரியமடைந்த மருத்துவமனை ஊழியர்கள், அதைக் கொண்டாடும் விதமாக கே.எஃப்.சி உணவை ஆர்டர் செய்து சாப்பிட்டதுடன், குழந்தையின் முதலாம் ஆண்டு பிறந்தநாளையும் அங்கேயே கொண்டாடலாம் என நெகிழ்ச்சியுடன் தெரிவித்தனர். பெற்றோர் அக்குழந்தைக்கு ‘கோடி’ (Cody) எனப் பெயரிட்ட நிலையில், கே.எஃப்.சி நிறுவனர் கர்னல் சாண்டர்ஸைக் (Colonel Sanders) குறிக்கும் வகையில் உறவினர்களும் நண்பர்களும் குழந்தையை அன்போடு ‘கர்னல் கோடி’ (Colonel Cody) என்றே செல்லப் பெயரிட்டு அழைக்கத் தொடங்கினர்.
“என் வாழ்நாளில் நான் எதிர்பார்த்த பிரசவம் இதுவல்ல என்றாலும், இது பெரும் மகிழ்ச்சியைத் தந்துள்ளது; பிற்காலத்தில் தன் பள்ளி நண்பர்களிடம் பகிர்ந்து கொள்ள இவனுக்கு ஒரு சுவாரசியமான கதை கிடைத்துள்ளது” எனத் தாயார் கேட்டி மகிழ்ச்சி தெரிவித்தார். இந்த விசித்திரமான சம்பவம் கே.எஃப்.சி நிறுவனத்தின் கவனத்திற்குச் சென்றதை அடுத்து, “கோடி பிறந்த இடமாக எங்களது உணவகம் அமைந்தது எங்களுக்குப் பெருமை அளிக்கிறது” எனத் தெரிவித்த அந்நிறுவனம், அக்குடும்பத்திற்குத் தங்கள் வாழ்த்துகளையும் சிறப்புப் பரிசுகளையும் வவுச்சர்களையும் வழங்கி உபசரித்துள்ளது.