திருவள்ளூர் மாவட்டம் ஆவடி அருகே ராஜீவ் காந்தி நகர் 7வது தெருவை சேர்ந்த ஜேசிபி டிரைவரான கிருஷ்ணா (26) என்பவருக்கு காந்தமேரி என்ற மனைவியும், மூன்று வயதில் லோகேஸ்வரி என்ற மகளும், எட்டு மாத பெண் குழந்தையும் உள்ளனர். இவர்கள் காந்தமேரியின் தாயார் சொர்ணாவுடன் குடும்பத்துடன் வசித்து வந்தனர். நேற்று மாலை மூத்த மகளை பால்வாடியில் இருந்து அழைத்து வந்த காந்தமேரி வீட்டுக்கு திரும்பிய போது ஹாலில் இருந்த தண்ணீர் வாளிக்குள் 8 மாத குழந்தை தலைக்குப்புற விழுந்து கிடந்தது.
உடனே அதிர்ச்சி அடைந்து குழந்தையை மீட்டு அருகில் உள்ள மருத்துவமனைக்கு அழைத்துச் சென்ற நிலையில் குழந்தை ஏற்கனவே உயிரிழந்து விட்டதாக மருத்துவர்கள் கூறியுள்ளனர். இந்த சம்பவம் தொடர்பாக போலீசார் வழக்கு பதிவு செய்து விசாரணை நடத்தி வருகிறார்கள். குழந்தையை கவனித்து வந்த சொர்ணா தூங்கிக் கொண்டிருந்தபோது குழந்தை தவறி விழுந்ததாக கூறப்படுகிறது. குழந்தையின் மரணம் சந்தேகத்தை ஏற்படுத்தி உள்ள நிலையில் போலீசார் தீவிர விசாரணை மேற்கொண்டு வருகிறார்கள்.