மத போதனைக் கூட்டத்திற்கு வராததால் ஆத்திரம்… இளைஞரைத் தூக்கிச் சென்று அம்பேத்கர் சிலை முன் சித்திரவதை செய்த கும்பல்… வைரலாகும் அதிர்ச்சி வீடியோ…!!

உத்தரப் பிரதேச மாநிலம் ஔரையா (Auraiya) மாவட்டத்தில், பௌத்த மத போதனை நிகழ்ச்சியில் (Buddhist story event) கலந்து கொள்ளவில்லை என்பதற்காக இளைஞர் ஒருவர் மிகக் கொடூரமான முறையில் தாக்கப்பட்ட சம்பவம் பெரும் பரபரப்பை ஏற்படுத்தியுள்ளது. துவாரகாபூர் கிராமத்தைச் சேர்ந்த அந்த இளைஞர், நிகழ்ச்சியில் பங்கேற்காததால் ஆத்திரமடைந்த ஒரு கும்பல், அவரைத் வலுக்கட்டாயமாக அவரது வீட்டிலிருந்து தூக்கிச் சென்றுள்ளது. அருகில் உள்ள காஜிபூர் கிராமத்தில் இருக்கும் அம்பேத்கர் பூங்காவிற்கு அழைத்துச் செல்லப்பட்ட அந்த இளைஞரை, அங்கிருந்த அம்பேத்கர் சிலையின் முன் தோப்புக்கணம் போட வைத்தும், காதைப் பிடித்து மன்னிப்பு கேட்க வைத்தும் அந்த கும்பல் சித்திரவதை செய்துள்ளது.

இந்தக் கொடூரச் செயலை வீடியோவாகப் பதிவு செய்து சமூக வலைதளங்களில் பரப்பியதால் பெரும் சர்ச்சை வெடித்தது. பாதிக்கப்பட்ட இளைஞர் அளித்த புகாரின் அடிப்படையில், காவல்துறையினர் வழக்குப் பதிவு செய்து தீவிர விசாரணை மேற்கொண்டனர். இது தொடர்பாக இதுவரை மூன்றுக்கும் மேற்பட்ட நபர்கள் கைது செய்யப்பட்டுள்ளனர். மத ரீதியான நிகழ்வுகளில் பங்கேற்காததற்காக ஒரு தனிமனிதரை இவ்வாறு பொதுவெளியில் அவமானப்படுத்துவது மனிதாபிமானமற்ற செயல் என சமூக ஆர்வலர்கள் கண்டனம் தெரிவித்து வருகின்றனர். அசம்பாவிதங்களைத் தவிர்க்க அந்த கிராமத்தில் கூடுதல் போலீசார் பாதுகாப்பு பணியில் ஈடுபடுத்தப்பட்டுள்ளனர்.