விஜய் ஜெயிச்சதும் மக்கள் மீது திடீர் பாசமா..? லதா ரஜினிகாந்தின் புதிய இயக்கத்தை.. வம்புக்கு இழுத்த ப்ளூ சட்டை மாறன்…!!

தமிழகத்தில் மக்கள் சேவை மற்றும் சமூகப் பங்களிப்பை நோக்கமாகக் கொண்டு, நடிகர் ரஜினிகாந்தின் மனைவி லதா ரஜினிகாந்த் “மக்கள் மேடை” என்ற புதிய இயக்கத்தைத் தொடங்கியுள்ளார். இது அரசியல் கட்சி அல்ல என்றும், அரசு அதிகாரிகள், ஆசிரியர்கள், இளைஞர்கள் மற்றும் ஓய்வு பெற்ற ஊழியர்கள் என சமூக அக்கறை கொண்ட அனைவரும் இணைந்து ஒரு மக்கள் சக்தியாகச் செயல்பட வேண்டும் என்றும் அவர் அழைப்பு விடுத்துள்ளார். ரஜினிகாந்த் அரசியலுக்கு வராமல் முழுமையாக சினிமாவில் கவனம் செலுத்தி வரும் நிலையில், லதா ரஜினிகாந்தின் இந்த புதிய முயற்சி தமிழக அரசியல் மற்றும் சமூக தளங்களில் பெரும் கவனத்தை ஈர்த்துள்ளது.

இந்த அறிவிப்பு வெளியான சில மணி நேரங்களிலேயே, திரைப்பட விமர்சகர் ப்ளூ சட்டை மாறன் லதா ரஜினிகாந்தை நோக்கி அடுக்கடுக்கான கேள்விகளை எழுப்பி பரபரப்பை ஏற்படுத்தியுள்ளார். இத்தனை ஆண்டுகளாக உங்களிடம் இருக்கும் ராகவேந்திரா மண்டபத்தில் எத்தனை ஏழைத் திருமணங்கள் இலவசமாக நடத்தப்பட்டுள்ளன என்றும், உங்களது ஆஷ்ரம் பள்ளியில் படிப்பவர்கள் ஏழை மாணவர்களா அல்லது வசதி படைத்தவர்களா என்றும் அவர் கேள்வி எழுப்பியுள்ளார். மேலும், இத்தனை ஆண்டுகளாக மக்கள் சேவை குறித்துப் பேசாதவர்களுக்கு, விஜய் அரசியலில் வென்ற பிறகா திடீரென மக்கள் மீது பாசம் வந்தது என்றும் அவர் கடுமையாக விமர்சித்துள்ளார்.

ப்ளூ சட்டை மாறனின் இந்த விமர்சனம் சமூக வலைதளங்களில் ஆதரவும் எதிர்ப்பும் கலந்த மிகப்பெரிய விவாதமாக மாறியுள்ளது. லதா ரஜினிகாந்தின் ஆதரவாளர்கள், நல்ல காரியங்களைத் தொடங்குவதற்கு காலநேரம் இல்லை என்றும், தொடங்கும் முன்பே விமர்சிப்பது தவறு என்றும் கூறி வருகின்றனர். மறுபுறம், ப்ளூ சட்டை மாறனின் கருத்தை ஆதரிப்பவர்கள், மக்கள் சேவை என்பது முதலில் சொந்த அமைப்புகளில் இருந்து தொடங்கப்பட வேண்டும் என்றும், இத்தனை ஆண்டுகள் இல்லாத அக்கறை இப்போது வந்தது ஏன் என்றும் கேள்வி எழுப்பி வருகின்றனர். இதனால் “மக்கள் மேடை” இயக்கம் தற்போதைய இணையதளங்களின் முக்கிய பேசுபொருளாக மாறியுள்ளது.