ஆம்ஸ்ட்ராங் கொலைக்குப் பழிதீர்க்கப் போட்ட பயங்கர ஸ்கெட்ச்… நடுவழியில் தூக்கிய தனிப்படை… அரக்கோணத்தில் சிக்கிய ‘ஒற்றைக்கண்’ ரவுடி…!

ராணிப்பேட்டை மாவட்டம் அரக்கோணம் கே.பி நகர் பகுதியில் வசித்து வரும் பிரபல ‘ஏ ப்ளஸ்’ பிரிவு ரவுடியான ஜெயபால் (என்ற) ஒற்றைக்கண் ஜெயபாலை (66) ரவுடிகள் ஒழிப்பு தனிப்படை போலீசார் அதிரடியாகக் கைது செய்துள்ளனர். இவர் மீது கொலை மற்றும் கொலை முயற்சி உள்ளிட்ட 13-க்கும் மேற்பட்ட குற்ற வழக்குகள் நிலுவையில் உள்ளன. குறிப்பாக, புளியந்தோப்பைச் சேர்ந்த பிரபல ரவுடி ஆற்காடு சுரேஷ் கொலை வழக்கில் ஜெயபால் முக்கிய குற்றவாளியாகக் கருதப்படுகிறார். மேலும், கடந்த 2024 ஆம் ஆண்டு ஜூலை 5-ம் தேதி பெரம்பூரில் படுகொலை செய்யப்பட்ட பகுஜன் சமாஜ் கட்சியின் மாநிலத் தலைவர் ஆம்ஸ்ட்ராங்குடன் இவர் நெருங்கிய தொடர்பில் இருந்தவர் என்பது குறிப்பிடத்தக்கது.

அடுத்த மாதம் ஜூலை 5-ம் தேதி ஆம்ஸ்ட்ராங்கின் முதலாமாண்டு நினைவு நாள் அனுசரிக்கப்பட உள்ள நிலையில், அவரது கொலை வழக்கில் கைதாகி ஜாமீனில் வெளிவந்துள்ள எதிர்த்தரப்பினரை பழிதீர்க்க ஒற்றைக்கண் ஜெயபால் மற்றும் அவரது ஆட்கள் சதித் திட்டம் தீட்டி வருவதாக உளவுத்துறை போலீசாருக்கு ரகசியத் தகவல் கிடைத்தது. அசம்பாவிதங்களைத் தடுக்கும் பொருட்டு, ரவுடிகள் ஒழிப்பு போலீசார் ஜெயபாலைத் தீவிரமாகக் கண்காணித்து வந்தனர். அப்போது, சென்னை பேசின் பிரிட்ஜ் காவல் எல்லைக்குட்பட்ட பகுதியில் உள்ள சில ரவுடிகளுடன் ஜெயபால் தொடர்ந்து பேசி வந்தது உறுதி செய்யப்பட்டது.

இதனைத் தொடர்ந்து, தனிப்படை போலீசார் நேற்று அரக்கோணத்தில் வைத்து ஜெயபாலை மடக்கிப் பிடித்துக் கைது செய்தனர். அவரிடமிருந்து இரண்டு கிலோ கஞ்சா பறிமுதல் செய்யப்பட்டது. பின்னர், பேசின் பிரிட்ஜ் காவல் நிலையத்தில் ஒப்படைக்கப்பட்ட ஜெயபாலிடம், ரவுடிகளுடனான தொடர்பு மற்றும் கொலைச் சதித் திட்டம் குறித்து போலீசார் தீவிர விசாரணை நடத்தினர். இதையடுத்து, அவர் மீது கஞ்சா வழக்கு பதிவு செய்யப்பட்டு, நீதிமன்றத்தில் ஆஜர்படுத்தப்பட்டு சிறையில் அடைக்கப்பட்டார்.