ஈரோடு மாவட்டம் அந்தியூர் அடுத்துள்ள தவிட்டுப்பாளையம் பகுதியில் பொற்கொல்லராக வேலை பார்க்கும் 35 வயது மதிக்கத்தக்க சுப்பிரமணியம் என்பவர், தனது ஏழு வயது சொந்த மகளுக்கே பாலியல் தொந்தரவு அளித்துள்ள சம்பவம் பெரும் அதிர்ச்சியை ஏற்படுத்தியுள்ளது. இது குறித்து மாவட்ட குழந்தைகள் பாதுகாப்பு மற்றும் உதவி மையத்திற்கு வந்த தொலைபேசித் தகவலின் அடிப்படையில் அதிகாரிகள் முதற்கட்ட விசாரணை நடத்தினர். அதன்பிறகு, பவானி அனைத்து மகளிர் காவல் நிலையத்தில் குழந்தைகள் உதவி மையத்தின் சார்பில் அதிகாரப்பூர்வ புகார் அளிக்கப்பட்டது.
இந்தப் புகாரின் அடிப்படையில் காவல்துறையினர் விசாரணை மேற்கொண்டு, சிறுமியின் தந்தையான சுப்பிரமணியம் மீது போக்சோ சட்டத்தின் கீழ் வழக்குப்பதிவு செய்து அவரை கைது செய்தனர். அதனைத் தொடர்ந்து, ஈரோடு மகிளா நீதிமன்றத்தில் ஆஜர்படுத்தப்பட்ட அவர், நீதிபதியின் உத்தரவின் பேரில் நீதிமன்றக் காவலில் சிறையில் அடைக்கப்பட்டார். சொந்த தந்தையே மகளிடம் அத்துமீறிய இந்த சம்பவம் அப்பகுதியில் பெரும் பரபரப்பை உண்டாக்கியுள்ள நிலையில், காவல்துறை தரப்பில் இது குறித்த அடுத்தகட்ட விசாரணைகள் தீவிரமாக நடைபெற்று வருகின்றன.