குருகிராமில் வசிக்கும் பிரியங்கா ரீஹல் என்ற பெண், தான் தங்கியிருக்கும் ஸ்டுடியோ அபார்ட்மெண்ட் குறித்த வீடியோவை சமூக வலைதளங்களில் பகிர்ந்தது பெரும் விவாதத்தை ஏற்படுத்தியுள்ளது. மாதம் 25,000 ரூபாய் வாடகை செலுத்தும் அந்த சிறிய வீடு, அதன் அதிகப்படியான வாடகைக்காக நெட்டிசன்களிடையே ஆச்சரியத்தையும் அதிருப்தியையும் உண்டாக்கியுள்ளது.
இந்த வீடியோவில் அந்தப் பெண் தனது வீட்டின் வசதிகளைக் காண்பிக்கிறார். சிறிய இடமாக இருந்தாலும், அதில் ஒரு சமையலறை, படுக்கையறை மற்றும் பால்கனி ஆகியவை உள்ளன. மேலும், இந்த வாடகையில் மைக்ரோவேவ், பிரிட்ஜ், டிவி, வைஃபை மற்றும் பவர் பேக்கப் போன்ற அடிப்படை வசதிகள் அடங்கும் என்றும் அவர் குறிப்பிட்டுள்ளார். இடப்பற்றாக்குறை இருந்தாலும் பொருட்களை நேர்த்தியாக அடுக்கி வைத்துள்ளதாக அவர் கூறுகிறார்.
இருப்பினும், இவ்வளவு சிறிய இடத்திற்கு 25,000 ரூபாய் என்பது மிகவும் அதிகம் என்று பல பயனர்கள் கருத்து தெரிவித்துள்ளனர். குருகிராம் போன்ற நகரங்களில் வாடகை விண்ணை முட்டும் அளவிற்கு உயர்ந்து வருவதை இந்த வீடியோ சுட்டிக்காட்டுவதாக சமூக வலைதளங்களில் விவாதிக்கப்படுகிறது. அதேசமயம், நகரின் மையப்பகுதியில் பாதுகாப்பான மற்றும் வசதிகள் கொண்ட வீடு கிடைப்பது கடினம் என்பதால் இந்த விலை நியாயமானது என்றும் சிலர் கருத்து தெரிவித்து வருகின்றனர்.